Karimganj, K’lyngkot 17 :Ha kawei na ki jingioh kurup drok kaba heh hapoh ka jylla, ki pulit ka Karimganj hynne ka sngi ki la ioh ban kurup haduh 88 kilo u drok Yaba tablets na Nischintapur ha ki bynta jong ka Bagargul hapoh Karimganj district ka Assam.
Kane ka jingioh kurup drok kaba dei ruh kaba heh tam hapoh Assam kat haduh mynta ka la wan long hadien ba ka kynhun ki pulit ka Karimganj ki la lapdien ia kawei ka kali Alto kaba don ia u registration number AS-10A-6487 ha kaba kila ioh ban kurup noh shibun bah u drok.Ha kane ka jingjia ki pulit ki lam kem noh ia uwei u briew uba donkti ia uba la tip kyrteng kum u Hafiz Uddin.
Ha kaba nyngkong ki dkhot ka tnat Home guard kiba kynthup ia u Anupam Singha bad u Jasim Uddin ki la ioh ban kurup ia une u drok bad pyntip mardor sha ki bor pulit hadien ka jingpynlong ia ka jingtalasi ia ki kali.
Hadien ba la bishar bniah la ong ba une u drok ba la ioh kurup u shongdor haduh palat T.40 klur ha ki jaka iew beain jong ki ri ka pyrthei.Ka jingtohkit halor kane ka bynta ka dang iaid shakhmat.
Lah ban kdew ba ki pulit ka nongbah Guwahati ki la ioh ban kurup shibun bah u drok heroin napoh kawei ka jaka sahmiet ha Dispur ha kane ka sngi Saitjain ba la lah shibynta jong ka jingkhynra pyrshah ia ki kam khaii drok ha ka jylla.
Ka kynhun ki pulit hapoh ka jingialam jong u Joint Commissioner of Police (JCP) u Partha Sarathi Mahanta bd u ADCP Kalyan Pathak ki la pynlong ka jingkhynra ia kawei ka jaka sahmiet hadien ba kila ioh ia ka jingtip kaba bniah bad ioh ban kurup ia ki 20 tylli ki song ba la thep ia u drok heroin.Une u drok u shongdor kumba 2.4 klur, ong ka khubor pulit.
