Guwahati, Risaw 27 : Ha kawei na ki jingioh kurup drok kaba heh tam ki bor pulit ka Assam kila ioh ban kurup ia shibun bah u kynja uba shongdor haduh kumba T.15 klur.
Ia une u kynja la ioh kurup na ka thain Norabat ha ki bynta jong ka sorbah Guwahati mynta ka sngi Palei.Katkum ki tyllong khubor, ka kynhun jong ki pulit ka Asam kila pynlong ka jingkhynra hapoh ka jingialam jong u Joint Commissioner of Police u Partha Sarathi Mahanta.
Ki bor pulit kila kurup noh ia ka trok kaba don ia u registration number HR 38 T 2913 kaba pynkit ia une u kynja uba don ia ka jingkhia kaba haduh 2500 kilo.
Ki khubor ki iathuh ruh ba kane ka trok kaba la shah kurup noh kala pynkit ia une u kynja napoh Manipur bad ka dang don ha ka lynti sha Guwahati hadien ba ki bor pulit kila lapdien noh hapoh Jorabat.
Ia u nongniah jong kane ka trok uba la tip kyrteng kum u Ashok Kumar kumjuh ia u nongbud jong u, u Jitendra Kumara la kem noh napoh kane ka kali.Kine ki arngut ki dei na ka jylla Haryana bad Uttarakhand.
Haba ai khublei ia ki bor pulit ka Assam, u myntri rangbah (CM) ka jylla u Himanta Biswa Sarma ula pynpaw halor kane ka jingioh kurup lyngba ka twitter.
Kane ka jingioh kurup ka dei ruh ka sienjam ba pyrkhing ba la shim da u CM ka Assam ban tehlakam ia ki kam khaii drok ha baroh kawei ka jylla.
Na ka liang u myntri ka sorkar pdeng u Amit Shah ruh ula kyntu ia baroh ki Superintendent of Police jong ka thain Northeast ba kin shim ia ki sienjam ba pyrkhing na ka bynta ban tehlakam ia ki kam khaii drok beain.
U Amit Shah uba la don ha kane ka nongbah Guwahati ha kine ki khyndiat sngi ba la dep na ka bynta ka jingialang jong ka North East Council hadien ba ula pynmih ia katei ka jingkyntu.
Ha kawei pat ka bynta, ki pulit ka Assam kila ioh ban kurup noh ia kumba 1.26 kilo u drok heroin na Karbi Anglong ha kaba kila kem noh ruh ia ki briew kiba donkti ha kaba uwei na ki u dei napoh Assam bad kiwei pat na kiwei ki jylla.
