Guwahati, Nohprah 18: Ha kawei na ki jingioh kurup drok kaba heh ram mynta u snem, ki bor pulit ha Cachar district ka Assam ki la ioh ban kurup haduh 6.2 lak tylli ki dawai kuli Yaba tablets napoh kawei ka kali.
Katkum ki tyllong khubor, ia kine ki dawai kuli la ioh ban kurup na kawei ka kali hapoh ka ja ka ap pahara, kata hadien ba ki la ioh ia ka jingtip kaba bniah.
Ka tyllong khubor ka iathuh ba ka kynhun ki pulit ki la ioh ruh ban kem noh ia laingut ki briew nalor kine ki dawai pynbuaid. Baroh kiba la shah kynnoh donkti ki dei ki nongshong shnong ka Meghalaya. Nalor kata haba khein kyllum une u drok u shongdor haduh kumba 175 klur ha ki ja ka iew beain ka pyrthei.
Shuh shuh ka tyllong khubor ka la ong ruh ba kane ka jingioh kurup drok ka dei napdeng ki jingioh kurup kaba heh tam mynta ka snem bad ka jingtohkit halor kane ka dang iaid shakhmat ban lap ia ka tyllong jong une u drok.
