Imphal, Jylliew 15 :Ha kawei na ki jingioh kurup drok ka ba heh tam ka ba dang shen, ki bor pulit hynne ka sngi ki la lapdien ia kawei ka karkhana pynmih drok ha Thoubal district ka Manipur.
Nalor kata ha kane ka jingleit khynra, ki pulit ki la ioh ruh ban kurup haduh 222.85 kilo u drok brown sugar.Une u drok ba la ioh kurup na kane ka karkhana la antad ba u shongdor haduh kumba 200 klur ha ki jaka iew jong ki ri ka pyrthei.
Ia kane ka karkhana pynmih drok la lapdien hapoh hapoh ka jaka iew ba la tip kum ka Moijing Mina Bazar ka ba hapoh Thoubal district jong ka Manipur.Ia kane ka jaka pynmih drok la pyntreikam napoh ka iingsah jong kawei ka longkmie.
Shuh shuh ia ki tiar ki tar ba la pyndonkam ha ka ban pynmih ia une u drok brown sugar ruh la ioh ban kurup na ka iingsah jong kane ka longkmie, ong ki bor pulit ka Manipur.
Ha kawei pat ka bynta, kane ka longkmie ka la shah kem noh bad shah pynngat hapoh ki kyndon ain jong ka narcotic drugs and psychotropic substances (NDPS) act.Ka jingtohkit halor kane ka bynta ka dang iaid shakhmat, ong shuh shuh ki bor pulit.
