Tura, Nohprah 14 : Ki Pulit ka South Garo Hills hynne ka sngi Balang, kila ioh ban kurup ia bun bah ki synduk (case) shna bomb Improvised Explosive Devices (IED) bala buhrieh ha kawei ka pla plastic bad tep hapdeng jong kawei ka khlaw ha Dambuk.
Ki Pulit kila ioh ban kurup haduh 11 tylli ki synduk halor ka jingioh khubor ba kitei ki tiar ki don ha kane ka khlaw.
Ki Pulit kila suba jur ba kitei ki synduk shna bomb IED ki lah ban dei jong ka kynhun GNLA kaba ju smat ban pyndonkam ban pynbthei ia ki bomb IED da kaba pynap ha surok ia ki kali ba kit ia ki bor pahara.
U Commander-in Chief ka kynhun Sohan D Shira ula buhrieh ia bun bah ki tiar ialeh kynthup ki bomb bad ki tiar siat ha kylleng ki jaka jong ka khlaw Durama Hills, East Garo Hills bad ruh ha ka thain Rongara Dambuk ha South Garo Hills.
Kiba ju pyndonkam bha ia kine ki bomb ki kynthup ia ki Maoist, ki ULDA bad kiwei ki kynhun kiengatiar jong kane ka thain Shatei Lam Mihngi.
