Agartala, Rymphang 14: Ki shipai Border Security Force (BSF) ka Tripura ha ryngkat ki heh na ka tnat DRI ki la ioh ban kurup artylli ki biskit ksiar ba shongdor T.1.32 klur bad kem noh ia u briew uba donkti.
Ha ka jingthoh sha ki lad pathai khubor, ki shipai BSF ki la ong ba ka jingiakhun pyrshah ia ki kam khaii beain lyngba ki jaka khappud ha ka jylla Tripura ka dang iai bteng, bad ki shipai kane ka tnat ki dang iai bteng ban pynlong ia ki jingkhynra ba kyrpang ban pynjem khnap ia ki kynhun runar kiba donkti ha ki kam khaii beain ha ki jaka khappud hapdeng ka India bad ka Bangladesh.
Ha katei ka jingkhynra kaba la long ha ka 11 tarik mynta u bnai ki shipai BSF hadien ba ki la ioh ia ka jingtip lyngba ki heh ka tnat DRI ryngkat ka jingiatreilang bad ki nongsyntiat ka BSF halor ka jingdon jong ki nongkhaii ksiar beain, kumta ruh ki la pynlong ka jingtalasi ia kawei ka kali Bolero Pickup kaba don ia u registration no. TR01D3893 kaba dang thmu ban wan sha Agartala na Sonamura ha kaba kila ioh ban kurup artylli ki biskit ksiar kiba na bar ri ia kiba la buhrieh hajan ka jaka shong jong u nongniah.
Hadien kane la kem noh ia une u nongniah ia uba la tip kyrteng kum u Nazrul Islam uba dei na ka thain Srimantapur kaba hap hapoh Sepahijala district ka Tripura.
