Aizawl, Nohprah 19 :Ki bor pulit ka Mizoram ha ka 17 tarik mynta u bnai kila ioh ban kurup ia u drok Crystal Methamphetamine uba shongdor haduh kumba T. 60 klur na ka jaka ap pahara jong ki pulit ha Chalbawiha Junction hapoh Khankawn hajan Aizawl.
Ki bor pulit hadien ba kila pynlong ka jingkhynra ia kawei ka kali kaba wan na ka shnong Zokhawthar da ka jingthmu ban leit sha Aizawl hadien ba kila ioh ban kurup bun kilo u drok Crystal Methamphetamine uba shongdor haduh kumba 60 klur ha ki jaka iew beain jong ki ri ka pyrthei.
Na ka liang ki pulit kila ong ba ia une u drok la thep khleh lang bad kiwei pat ki mar khaii, bad ia une u drok la buhrieh bha ha ki 20 tylli ki jingdong kiba don ia ka shap jong u slasha napoh China.
Hadien kane ki pulit kila kurup noh ia ka kali bad ia une u drok bad kem noh ia u trai bad u nongniah jong ka kali bad la rejistar case pyrshah ia ki hapoh ki kyndon jong ka u/s 22(c)/25 ND&PS Act, ong ka khubor pulit.
Ha ka jingtohkit kaba shuh shuh, arngut kiwei pat kiba la shah kynnoh donkti ha kane ka kam khaii drok kiba kynthup ia u Lalthlamuana bad u Vanlalngura ruh kila shah kem noh ha ki bor pulit ka Aizawl.
Na ka liang ki pulit kila ong ba ka jingtohkit halor kane ka bynta ka dang iai bteng ban lapdien ia kiwei pat ki nongkhaii drok kiba don bynta.
Kham hashwa, kata ha u bnai Naiwieng ba la dep, ka tnat Criminal Investigation Department (CID) na ka tnat pulit ka Mizoram kila ioh ban kurup shibun bah u drok Methamphetamine uba shongdor haduh T.58 klur bad kem noh ia arngut ki briew na ki bynta ka sorbah Aizawl.
Hadien ba la ioh ia ka jingtip kaba bniah na ka tnat syntiat, ka kynhun na ka tnat CID (SB) kila ioh ban kurup haduh 2 lak tylli ki dawai kuli Methamphetamine kiba don ka jingkhia kaba 19.223 kilo na kawei ka kali ha ki bynta jong ka Luangmual napoh Aizawl.
Halor kane ka jingjia ki pulit kila kem noh ia arngut ki briew ia kiba la tip kyrteng kum u Shalim Uddin (26) bad u Aliqur Rohman (21 snem rta) baroh arngut kiba dei ki nongshong shnong ka Karimganj, Assam.Halor kane ka rejistar case pyrshah ia ki ha ki kyndon bapher bapher jong ka Narcotic Drugs and Psychotropic Substances (NDPS) Act, 1985.
