Shillong Naiwieng 17: Ka Cherry Blossom Festival 2025 kala sakhi ia ka jingrakhe ia ka jingdon sap bad ia ka jingbhabriew haba ka Lapynshai Marak kala ioh ia ka paiñsngiat kum ka Miss Cherry Blossom 2025, katba u Rohan Pradhan ula long u nongjop kum u Mr Cherry Blossom 2025.
Ha ka jingiakhun theibhabriew, ka Catherine Defini Diengdoh kala ioh ia ka nam 1st Runner-up katba ka Na-i-Staphi Nola Lyngdoh kala ioh ia ka nam 2nd Runner-up.
Ha ka jingiakob Mr Cherry Blossom ki shynrang, u Joel Desmond Nongrum ula ioh ia ka nam 1st Runner-up bad u Abiezer Dan ula ioh ia ka nam 2nd Runner-up.
Ia kane ka jingiakob la pynwandur da ka Miss Meghalaya Organisation, ha kaba kane ka jingiakob kadei kawei na kiba paw ha kane ka tamasa kaba mynta u snem, kaba pyninam ia ka jingngeit skhem halade, jingbha bad ka kolshor kaba iar, lyngba ki samla kiba don sap na kylleng ki bynta jong ka jylla.
Ki nongbishar ha kane ka jingiakob ki kynthup ia ka Shyamanga Kashyap kaba long ka Director jongka Miss Assam bad Talent Scout ia ka Miss India, ka Akumnaro Imsong kaba la rah teng mynshuwa ia ka nam Miss Nagaland bad ka Co-Director jongka Miss Assam, ka Aakriti Shen kaba la rah teng ia ka nam Miss Meghalaya bad Miss Shillong bad u Deibormi Lyngdoh u nongiaid Model uba rim bad u nongjop ia ka khusnam Mr Fresh Face Meghalaya 2017 bad Shillong Prince 2018.
Kane ka jingiakob kala kut da ka jingkmen bad jingsngewbha da ka jingsawa ia ki sur ai jingkyrshan jong ki nongpeitkai, haba ki nongjop kila sdang ia ka lynti iaid ka jongki kum ki Nongkit Tiensyiem jong ka Kolshor ne Cultural Ambassador jong ka Cherry Blossom Festival.
