Shillong, Iaiong 08 : Ka North East Cricket Development Council, kala ai ia ka khusnam ba kyrpang ia ka Meghalaya Cricket Association kum ka jingithuh ba ka ialehkai ha ka lympung ialehkai Elite Group jong ka BCCI ba dang shu kut dang shen.
Ia kane ka khusnam la ai ha ka 4th Achiever’s Nite bala pynlong da ka North East Cricket Development Council kaba long ha Chintan Hall, Gangtok myn ha ka 6 tarik Iaiong.
Ka NECDC kaba khmih ia ki 6 tylli ki Jylla NE kala pynkup burom ia ki nongialehkai ba ialehkai bha jong ki shynrang bad ki Kynthei ha baroh ki jait jingialehkai hala iing (domestic) ba dang shu dep jong ka BCCI.
U Myntri Rangbah ka Sikkim Prem Singh Tamang ula iashimbynta kum u kongsan bad u Lamphang ka Sikkim Legislative Assembly kum u symbud kongsan bad ki Myntri Sorkar kum ki nongshah khot sngewbha ba kyrpang.
Ka Meghalaya CA kala ioh ia ka khusnam ba kyrpang kum ka jingithuh ia ka jingiashimbynta ha ka lympung ialehkai Elite Group jong ka BCCI ha kane ka samoi ba dang shu dep nalor kiwei kiwei ki khusnam shimet.
Nalor u Myntri Rangbah ka Sikkim, kiwei pat kiba la iadonlang ki kynthup ia u MKJ Mazumdar Apex Council Member BCCI, Naba Bhattacharjee President MCA bad Co-Convenor NECDC lem bad u T. Subba President Sikkim CA.
Ki President bad Hony. Secretary jong baroh ki Association ki Jylla kila shah pynkup burom ha u kongsan bad ka Meghalaya CA kala pynkup burom ia u Myntri Rangbah da ki jain tynrai ki Khasi bad Garo nalor kiwei kiwei ki jingai sngewbha.
