Shillong Nailar 03: Ka Aiti Belti Trattoria kaba don ha Khyndailad, Shillong kala ioh ia ka khusnam India’s Most Prominent Food & Hospitality Awards-2023 na ka Merit Awards Market Research Pvt Ltd ha ka jingialang kaba la long ha ka 1 tarik u Nailar ha nongbah Delhi.
Ia katei ka Khusnam ban ainam ia ka jingtbit ha ka shet jingbam jingdih bad ka akor sam bam sam dih, la sam sha palat sawphew ngut ki riewtbit ha ka shet ka tiew bad ka jingnang ban burom ia ki para briew ha la ki shlem aibam aidih.
Ia kane ka khusnam la sam da u nongshet ba pawnam tam ha Ri India u Sanjeev Kapoor kum u kongsan ha ka jingdon ryngkat ki kynrem lyndan na ki shlem shna jingbam jingdih ba kongsan ha Ri India.
Na ka thaiñ Shatei Lammihngi ka Ri India la ioh ia katei ka khusnam tang ka Aiti Belti Trattoria na Shillong bad ka Khorikaa Restaurant na Guwahati bad ia kine ki khusnam la jied kyrpang halor ka jingtbit ban shet ban tiew, ba bang ba shngiam ka bam ka dih, ba khuid suba, ba pnah ban khring ia ki briew da ka akor burom bad kiwei kiwei ki jingtbit kyrpang ha ka liang ka jingiadei bad ka die jingbam jingdih.
Ka Khusnam kum ka basa bam ba biang tam na jylla la ioh pdiang da u Bah Balawanpynskhem Suting, ba ju sin kum u Bah Richie na ka bynta ka basa Aiti Belti Trattoria na Khyndailad, Shillong.
