Shillong, Nailur 12 : Ki Ophis ka Employment Exchange na ki District bapher bapher ka Jylla, kila lah ban pynioh kam tang 3 ngut ki briew ha ki kam Sorkar ha kine ki lai snem bala lah.
Na kine, 2 ngut kila iohkam ha u snem 2023, 1 ha u 2024 bad nod ha u 2025.
Kane ka jingduna palat liam kala wan wat hapdeng ka jingdon haduh 13 tylli ki Ophis Employment Exchange ha kylleng ka Jylla, kaba don ruh haduh 103 ngut ki nongtrei ba pura.
Ia kane la pyntip da u Myntri ka Tnad Labour Bah Shakliar Warjri ha ka jubab bala wanrah hapoh ka Iingdorbar ha ka sngi Thohdieng.
