Shillong, K’Lyngkot 17: Ka seng Voice of the People Party (VPP) hynne ka sngi kala pyntip ba ka pisa ba la ioh lum naka jingialang ba la pynlong ha madan Polo Shillong ha ka 16 tarik mynta u bnai, kaba kot haduh T. 1,73,223.
Ka kyrwoh na u nongaiktien ka VPP u Dr. Batskhem Myrboh ka pyntip ba ka Party ka ai khublei ia baroh ki paidbah kiba la wan sha ka jingialang ha ka 16 tarik bad kiba la noh synniang daka pisa naka bynta ka Party.
Ka kyrwoh ka kdew ruh ba kane ka jingkloi ki paidbah ban noh synniang sha ka Party ka nang ai mynsiem shuh shuh ban nang trei shitom naka bynta ban poi sha ka jingjop khnang ban ioh ban synshar khambha iaki paidbah hadien ka ilekshon 2023.
Ha ka juh ka por ka VPP ka iawer ia ki paidbah ban iasoh sha kane ka Party naka bynta ban pynthikna ban wanrah ka synshar khaddar kaba khuid ba suba hapoh ka jylla.
