Tura, Kyllalyngkot 12: Ban kyntiew iaka kam ialehkai hapoh Ri-lum Garo khamtam eh ha ka jingia mareh, u Myntri Rangbah ka jylla Conrad K Sangma hynne ka sngi Thohdieng, ula plie paidbah ia ka Track and Field Athletics Stadium kaba nyngkong eh ha ka thaiñ kaba don ha Dakopgre ia kaba la ai kyrteng pynsahnam ia u Khla Wait ka Ri-lum Garo u Pa Togan Nengminja.
Ia kane ka madan mareh la bhah tyngka ha u snem 2020-21 ha ka jinglut jingsep kaba kot T.16.02 Klur (Phase-1) bad kane ka jaka mareh kaba don 8 tylli ki track, kadei kaba la shna kat kum ka international sporting standard bad ka lah ban rung haduh 2000 ngut ki nongpeitkai.
U Conrad K Sangma ula iaroh ia ka jingshimkhia ka sorkar jylla ban kyntiew ia ka kam ialehkai hapoh ka jylla bad ula ong ba ha kine ki 3-4 snem ban wan, ka Meghalaya kan sa long ka jylla kaban kiew bha ha ki kam ialehkai hapoh ka thain lda kam pat lah ban long ha ka ri baroh kawei ruh.
“Ka Meghalaya kan sa long kum kawei na ki jylla kiban wan shakhamt bha haka jingpynbiang ia ki jingdonkam ha ka kam ialehkai kaba kiwei pat ki jylla kin ym pat don bad ka daw ka long ba ngi la bhah tyngka ha ka kam ialehkai namar ba ngi ngeit skhem ha ki samla ki jong ngi, ngi ngeit skhem ia ka jingbhah tyngka ha ki samla, ka jingdonkam ban ai ka lad ia ki samla ba kin lah ban leh bad ban bud iaka jingsngewtynnad bad ka jingthrang ka jongki ban kiew shaphrang ha ka kam ialehkai. Kane kadei ka lad kaba ka sorkar jylla ka kwah ban pynbiang naka bynta ki khynnah” ong u Myntri Rangbah.
Ula pynpaw ruh ba ka Meghalaya kala iohi iaka jingiohnong na ka kam ialehkai, ka tem ka put, ka kam seng kam lajong lyngba ka PRIME programme bad CM Elevate.
“La kadei ka tem ka pur ne ka kam ialehkai, Ngi khmih lynti ba shen ngin sa iohi ia ki samla ki jong ngi ba kin don ha ki kyrdan ha ka Regional, National bad International” ong u Conrad Sangma bad ka bynrap ba ka Super Athlete Programme ha Meghalaya kaba la tip kum ka Star Program kadei kawei bad kaba lah ruh ban long thik tang kane hi ka prokram hapoh ka ri, ha kaba ki nongialehkai kila shah khmih bniah da kaba pyndonkam iaka bor jong ka jingstad science ban lap iaka jingtbit bad ka jingkhlain ka jongki.
“Mynta, ha ka Star programme, kila don 12 ngut ki Super Athletes napdeng jong ki 15000+ kiba la dep ban khmih bniah kiba lah ban iashimbynta ban iakhun ha ka International Standard. Kin ym lah ban tip lada dei bay m shim la sdang iaka Star Program” la phla u Conrad Sangma.
U Myntri Rangbah ula iakren ruh bad ki nongialehkai bad ula ong ia kiba kin shim ia kane ka jaka ialehkai kum kata kajak kaba kyntang kaba kin ioh jinghikai ba kin pyntbit ialade bad ban tynjuh ruh iaka jingkhlain ka jong ki.
“Ngi la rai ban pynlong iaka Meghalaya Games man la u snem, kaban sdang naduh mynta u snem bad ngin pynlong ha man la ki thaiñ man la ka snem. Nalor ka jingai ka rynsan ia ki samla lyngba ki kam ialehkai, ngin tei bad pynbiang ia ki jingdonkam ia kaba ngin sa aiti kylla sha ka imlang sahlang. Kumba 50% ka pisa kaba la pynthud ha kaban pynbiang ia ki jingdonkam bad ban shna ia ki jingtei na ka bynta kane ka jingialehkai la leh hapoh ki jaka pule kum ki skul bad kolej, kumta tang shu kut ka jingialehkai kitei ki jaka pule kin ioh ban pyndonkam na ka bynta ka jingmyntoi jong ki khynnah pule” ong u Conrad Sangma.
 bad kane ka jaka mareh kaba don 8 tylli ki track, kadei kaba la shna kat kum ka international sporting standard bad ka lah ban rung haduh 2000 ngut ki nongpeitkai.){kind=link}