Nongpoh, Nohprah 13: Ka shnong Lum-Umpih Umsning kala ioh ia ka madan ialehkai bala pyntrei lyngba ka skhim jong ka State Sports Council bala mang pisa ha ka jinglut kaba kot T. 24.37 lak.
Ia kane ka madan ialehkai la plie paidbah hynne ka sngi ba-ar da u MLA ka Umsning Bah Jason Sawkmie Mawlong ha ka jingiadonlang u BDO ka Umsning Block u R Brahma, u Rangbah Shnong ka Lum –Umpih Bah Benedick Syngkli, ki Nongkitkam ka Seng Samla bad kiwei kiwei.
Haba ai jingkren, u Bah Jason Sawkmie Mawlong u la pynpaw ia ka jingkmen kaba khraw ban ioh ban pynurlong ia ka jingangnud jong ka Dorbar Shnong Lum-Umpih Umsning khamtam ka Seng Samla Shnong kiba la donkam kyrkieh ia ka madan kaba paka na ka bynta ban ioh ban pynlong ia ki prokram bad ki kam ialehkai bapher bapher.
U la kyntu ruh ia ka Seng Samla Shnong ba kin pyndonkam hok ia kane ka madan khnang ba kin lah pat ban ioh jing myntoi ha ki sngi ki ia kiban dang wan khamtam kane ka madan kan long ruh kum ka lad ia ki samla ialehkai ban ioh pyntbit ialade ha ki kam ialehkai sport bapher bapher bad ban kiew ha ka sap ialehkai ka jong ki.
Ha kane ka sngi, ka Seng Samla Shnongka la pynlong ruh ia ka lympung ialehkai football jong ki kynthei bad shynrang ha kaba la sam ruh ia ki khusnam sha ki kynhun nongjop.
