Shillong, Risaw 29: Ka nongbah Shillong kala iohpdiang iaka khusnam “City with the Best Record of Public Involvement in its Transport Planning” na ka bynta ka project “Shared Commuter Service in East Khasi Hills (Shillong).
Ka dei ka sienjam kaba la pyntreikam da ka Sustainable Transport and Efficient Mobility Society (STEMS)”, ha ka jingrakhe iaka 16th Urban Mobility India Conference and Expo 2023, kaba la long ha ka 27 haduh ka 29 tarik u Risaw ha Nongbah Delhi.
U Manoj Joshi, Secretary – Ministry of Housing and Urban Affairs, jong ka sorkar India ula aiti ia katei ka khusnam sha ka STEMS hynne ka sngi u Blei.
Ka Kong Isawanda Laloo, kaba long ka Secretary jong ka sorkar jylla bad ka CEO jongka STEMS, ryngkat bad ki dkhot jongka STEMS kila pdiang ia katei ka khusnam.
Kiwei pat kiba la iohpdiang ia ka khusnam ha ki kyrdan bapher bapher ki kynthup ia ka Delhi, Lucknow, Srinagar, Bhubaneswar, Kochi bad Jabalpur.
Ka STEMS kala ioh pdiang iaka khusnam kaba nyngkong eh hapoh ka ri bad kala ioh ia katei ka khusnam halor ka jinglah ka STEMS ban pyndonbynta ia baroh kiba kynthup ia ki nongialam shnong, ki bor pyniaidskul, ki kmie ki kpa ryngkat bad ka jingiatai bad ki tnadsorkar bapher kum ki bor pyniaid district jongka East Khasi Hills, Shillong Traffic Police, PWD, MTC bad kiwei kiwei ha ka jingpynwandur bad jingsaindur ia katei ka jingthmu.
