Shillong, Jymmang 28: Ka North-Eastern Hill University (NEHU), Shillong kala ioh iaka kyrdan kaba 15 kum ka Central University kaba paw ha ka ri baroh kawei katkum ka jingpynbna jong ka Indian Institutional Ranking Framework (IIRF) 2023.
U Prof. Prabha Shankar Shukla, Vice-Chancellor ka NEHU ula ai khublei ia baroh ki nonghikai, nongtrei bad ki samla pule bad ia baroh kiba don bynta lang ban sdang pynurlong iaka thong ban pynlong iaka NEHU kaba yn tip da ka pyrthei baroh kawei.
Ula ong, ka IIRF – 2023 watla kam long kumjuh kum ka NIRF ranking framework, hynrei kadei ka jingiaid shi jam ha kaban ioh kheit ia u soh ka jingjop bad ka skulbah kala trei shitom ha kaba iadei bad kane ka bynta.
“Ka khlam COVID kala ktah ia baroh bad kam shym la pyllait ruh wat ia ki nonghikai. Ka NEHU ruh kala shah ktah jur bha, hynrei ka jingioh iaka kyrdan kaba 15 haka IIRF Ranking, ka skulbah NEHU kala nang pynskhem iaka kyrdan ka jongka kum ka jaka pule kaba wan shakhmat hapoh ka ri” ong u Vice Chancellor.
U Prof. Shukla ula shimti kum u Vice-Chancellor ka NEHU ha ka por ba ka khalm COVID-19 ka dang jur bha .
Kane ka University mynta ka don bun ki centre katkum ka jingdonkam kane ka juk kaba mynta kum ka Design Innovation Centre, Office of International Affairs, Research and Development Cell, Dr. Ambedkar Centre of Excellence, Bio Incubator Centre, Livelihood Incubation Centre bad ka don ruh iaka jingthmu ban sdang noh iaka Skill Development Centre.
U Vice-Chancellor ula ong, ba ka University kala trei shitom ruh na ka bynta ban pyniohkam iohjam ia ki samla pule lyngba ka Placement & Training Cell bad kala lah ruh ban pynlong ia katei ka prokram ha kaban ialeh katba lah ban pyniohkam pyniohjam ia ki samla pule hadien ba kila dep ban pyndep iaka jingpule kaj ongki na NEHU.
Dang shen ka Dalmia Cements kala shim da ki samla pule ka NEHU ha kine ki 6 bnai kiba la dep bad na ka liang jong ka emami ruh kala shim ia ki samla pule ka NEHU bad kane ka skulbah kala dep ruh ban iasoi ia ka MoU bad ka Sodexo, kaba dei ka Multinational Company kaba shim ia ki samla pule na ka bynta ban iatreilang bad ban thungkam thungjam syndon ia ki.
U Vice-Chancellor ula ong ba ka thong ba kongsan jong ka University mynta ka long ban ioh ia ka kyrdan kaba bha shuh shuh haka NIRF Ranking bad ban rah shajrong iaka nam jong ka skulbah bad ba nshakri iaka imlang sahlang, ka jylla bad ia ki samla jong ka thaiñ.
