Shillong, K’lyngkot 19: Ka Jylla Meghalaya kala ioh ia 3 tylli ki khusnam National Awards ha ka 6th Digital Transformation Summit & Awards kaba la long ha New Delhi, kum ka jingai jingithuh ia ka jingtbit ha ka Geospatial Technology, Digital Governance bad Public Service Delivery.
Kane ka khusnam ka pyni ba ka Meghalaya kala jam shaphrang ha kaba iadei bad ka jingleh ia kiei kiei kiba long thymmai lyngba ki kor teknoloji hapoh ka jingialam u Myntri Rangbah u Conrad K. Sangma, kaba pynskhem ia ka jingkut jingmut ka jylla ban ai ia ka jingshakri kaba salonsar bad kaba don ruh ia ki jingtip kiba biang ha kaba iadei bad ki kam pynroi ha sor, ka jingai jingshakri ia ki nongshong shnong, ka koit ka khiah ki paitbah, la pynpaw lyngba ka kyrwoh khubor na ka Planning, Investment Promotion and Sustainable Development Department hynne ka sngi Nyngkong.
Hapoh jongka Planning, Investment Promotion and Sustainable Development Department, Meghalaya ONE, kala ioh ia ka jingithuh ha ka kyrdan “Innovative Use of Digital Technology in Enhancing Public Service Delivery.”
Ka Meghalaya ONE kadei kawei ka rynsan digital kaba ailad ia ki nongshong shnong ban ioh jingtip ia ki skhim sorkar, ki jingshakri bad ki lad ban phah ia ki jingujor lyngba kawei ka rynsan, kaba ioh lyngba ka web, ka jingleit mih dalade ha ki service centre bad village data volunteers.
Ka Meghalaya State GIS and UAV Centre, hapoh jongka Meghalaya Basin Development Authority (MBDA) bad Planning, Investment Promotion and Sustainable Development Department, kala ioh ia ka khusnam ha ka kyrdan “Excellence in Use of Geospatial Technologies for Transportation, Urban Development, and Other Projects.”
Kane ka sienjam kala ioh ia ka khusnam halor ka rynsan prokram ka Meghalaya State Geo Portal (Meghalaya State GeoHub). Da kaba pyndonkam ia ka AI, kane ka rynsan ka ai ia ki jingtip kiba kordor kiba lah ban iarap ha kaban shim ia ki rai bad ia ki jingtip kiba bniah kiba lah ban iarap ha kaban buddien kum ia ka jingpynjulor ia ki khlaw ki btap, ban batai lypa ia ka jinglong jingman ka suinbneng, ban kyrshan da ki sabut ban ioh shim ia ki rai kiba biang.
Ka National Health Mission (NHM), jong ka tnad ka koit ka khiah ka Jylla Meghalaya, kala ioh ia ka khusnam ha ka kyrdan “Innovative Digital Health Services and Public Health Data Analytics.”
Ka NHM kala ioh ia ka Award of Excellence halor ka jingmaitphang ia ka sienjam kaba la tip kum ka MOTHER app. Hapdeng u snem 2020 bad 2025, ka Meghalaya kala ioh ia ka rekod ha kaba kala lah ban pynduna haduh 60 percent ia ka jingkhlad ki longkmie kiba punkhun bad ka jingduna da 34 percent ha ka jingkhlad ki khunlung kiba dang shu dep kha, kaba pyni ia ki jingtip kiba shisha kaba lah ban pynbeit ia ki jingeh bad ban ai jingkhein ha kylleng ki bynta kiba iadei bad ka koit ka khiah.
Ia kane ka jingai khusnam la pynlong da ka Governance Now kaba dei ka kynhun kaba pawnam ha kaban pynmih ia ki jingthoh bad kaba pynleit jingmut halor ki polisi treikam na ka bynta ki paidbah bad ka jingai jingshakri ki sorkar.
