Shillong, Nailur 25: U Nongialam ka BJP Meghalaya uba long ruh u nongialam ba rangbah na rilum Garo, Rikman Momin ula shah thung kum u President ba thymmai ka BJP Meghalaya da kaba mih bujli noh ha ka jaka jong u Bah Ernest Mawrie.
Kat kum ka jingpynbna u National General Secretary & headquarter in-charge ka BJP Arun Singh, ula pynpaw ba u National President ka BJP Jagat Prakash Nadda ula thung ia u Rikman Momin kum u president ka Meghalaya BJP.
Haba kyrshan ia kane ka rai kaba la shim da ki nongialam ka seng, u Bah Ernest Mawrie ula pynpaw ia ka jingsngewnguh ia ki nongialam kiba hakhlieh halor ka jingioh ban treikam kum u President na ka bynta 3 snem.
“Ngi la trei kum ka kynhun. Kadei ka rukom treikam ha ka seng ba haba ka samoi treikam kala kut,ngi jied noh da u President uba thymmai. Ngan bteng ban trei na ka bynta ban pynkhlain ia ka seng” ong u Bah Mawrie.
Haba kylli balei ym shim la don ka jingiakhun elekshon, u Bah Mawrie ula ong ba ia ka rai la shim da ki nongialam kiba ha khlieh. Ula pynshai ba ha ka sengkmie hi ki ju iaid beit da ka lynti ban shu thung.
“Kin don ar jait ki jingtreikam : Ka jingthung (nominate) bad ka elekshon, haduh mynta ngi la bud beit ia ka rukom ba shu thung. Haba ki jied ia nga kum u President ha u 2020, ka jan long kum ka elekshon namar ba ki don 3 ngut kiba thep kyrteng ban iakhun, u Bah AL Hek, Bah David Khasrsati bad ma nga, nga la shah jied kum u president,” ong u Bah Mawrie.
Namar ka kyrteng kala pynkyndit ia kiba bun ki dkhot jong ka seng, u Bah Mawrie ula ong ba kam shym la don ka jingiakren halor ki kyrtong ne iano ba yn ai jingmut (recommend).
Une u President ba thymmai Rikman Momin, la khmih lynti ba un sa shimti noh ia ka kam President ha kine ki shisngi arsngi ban wan.
