Shillong, Naiwieng 27 : Ka kong Karina Sheen Phira kala ioh long ka trai jong ka kali thymmai Toyota Glanza 2023 Model, na ka khalai nusib napdeng ki season passes (ticket) jong ka Shillong Cherry Blossom Festival, 2023.
Ka kong Karina Sheen Phira kala shah jied naphang (random) napdeng ki nongleit tamasa kiba thied ia ki season passes, kaba la nang pynkmen shuh shuh ia kane ka nongleit tamasa.
Ka Shillong Cherry Blossom Festival 2023, ka dei kaba la pynlong ha ka 17 tarik haduh 19 tarik Naiwieng ha madan Kurkalang, Bhoirymbong. Kane ka tamasa kala khring ia ka jingwan iashimbynta jong ki briew na kylleng ki ri ka pyrthei bad ka jingdon jong ki nongput nongtem bad ki nongrwai kiba pawnam ka pyrthei nalor ki kaitor trai ri.
Ki kaitor ba pawnam jong ka pyrthei kum u Ronan Keating, Neyo, Hybrid Theory, Jonas Blue, Sanam bad ki kaitor nala ri kum u Lou Majaw, Snow White, Meba Oflilia, Wanjot Sohkhlet, Banjop bad kiwei, kila pynshong shit ia ka tamasa bad nang rah shajrong ia ka nam ka Jylla ha ka liang ka put ka tem bad ka sap sengkam jong ki samla.
Nalor ka put ka tem, ka tamasa kala ai ka rynsan ia ki nongsengkam lajong, kiba la ioh buh ia ki dukan (stall) ban pyni nam ia ki tiar ki tar ba shna kti napoh ka Jylla, ka bam tynrai bad kiwei kiwei.
Ka Toyota Glanza 2023, ka kali top modep bala synniang sngewbha da ka Highland Toyota, kala nang pynsngew tynnad arshah ia ka kong Karina Sheen Phira ban kynmaw ia kane ka tamasa.
