Shillong, Nailar 13: U Myntri Rangbah ka Jylla u Conrad K Sangma ha ka sngi Balang, ula plie paidbah iaka Babies’ Critical Care Unit (SNCU, NICU & MNCU) ha Ganesh Das Government Maternal and Child Health Hospital, Shillong.
Ha kane ka sngi, la don lang ka Myntri ka tnat ka koit ka khiah ka Kong Ampareen Lyngdoh, u Principal Secretary u Sampath Kumar, u Commissioner & Secretary u Dr Joram Beda bad ki heh ophisar.
Haba aijingkren ha ka jingialang, u Conrad u la ong ba ka Jylla ka dang don bun ki lad ban kyntiew iaki jaka sumar hynrei kam mut ba tang ki jingbei tyngka ha ka liang ki jingtei, ki mashin ne ki tiar kiba wanrah ia ka jingkylla hynrei ka jingtrei ki briew kaba long ki nongpynkylla bashisha.
“Ka long kaei kaei kaba ai mynsiem ban iohi ba ka kynhun ka tnad ka Koit ka Khiah, wat hapdeng ki jingeh ki wanrah ïa ka jingkylla haki lad ai jingsumar iaki paidbah hapoh ka Ganesh Das Hospital,” la ong u Conrad.
U Conrad ula ong ba ia kane ka khana dei ban iasam sha kiwei pat ki jaka sumar ha kylleng ka jylla khnang ba kin ioh mynsiem ban long ka jingkylla kaba ki kwah ban iohi.
U Myntri Rangbah u la pyntip ba kumba 9 percent na ka mang tyngka jong ka Jylla la pynlut ha ka tnat ka koit ka khiah bad u la pynthikna ruh ba ka Sorkar kan nang ai ka jingkyrshan na ka bynta ban pynbha shuh shuh ïa ki jingtei ha Ganesh Das Hospital.
U la pyntip ruh ba ka Sorkar ka shim daki sienjam ba skhem bad ba bha ban pynthikna ba ha u snem 2025, ka Shillong Medical College kan sdang noh bad ba ka Tura Medical College ruh kan sdang noh ha u snem 2026.
Ula bynrap ruh daka ba ong ba ka Sorkar kala pynlut bun ka jingbei tyngka ban pynthikna ba ki jaka sumar wat ha ki jaka nongkyndong ruh kin long kiba biang bad kiba bha tam.
U Myntri Rangbah u la pynpaw ruh ïa ki katto katne ki jingthmu jong ka Sorkar ban pynbha ïa ki jaka sah jong ki nongtrei ka koit ka khiah bad ki jaka sumar khamtam ha ki jaka nongkyndong.
Nalor kane u Conrad u kyntu ïa ki doktor bad ki nongtrei ka Ganesh Das Hospital ba kin long don daka jingthmu ban shakri iaki paidbah bad ula bynrap daka ong “Nga kyntu ïa ki nongtrei bad ka kynhun ba kin ïalam beit da kata ka jingsngewhun bad jingthmu ban pynim ïa ki jingim,”.
Naka liang ka ka Myntri ka koit ka khiah, ka Kong Ampareen Lyngdoh, ka la ong ba ka dei ka jingpyrshang jong ka Sorkar ban iohi ba uwei pa uwei u nongpang bad uwei pa uwei u khynnah u ioh ia ka jingsumar kaba bha tam bad ban ioh ia ka jingsumar kaba khlem da pynlut ia ka pisa.
Ka Kong Ampareen kala ong ruh ba ka Sorkar ka dang trei ban pynbeit ïa ki jingeh ba ki nongtrei ka koit ka khiah ki iakynduh. Kala pyntip ba ka sorkar kala pyrshang ruh ban pynthikna ba ki doktor jong ka Jylla ki dei ban wan biang ban shakri ha kane ka Jylla.
Kane ka dei ka jaka sumar sorkar kaba nyngkong eh ha ka jylla ban don ïa ki SNCU, NICU & MNCU bad ki jingtei kin pynlah ia ka hospital ban ai jingsumar hadien ba la kha ia ki khunlung.
Ka SNCU-NICU complex kaba don 30 jingthiah bad la shna bad pyntreikam ha ka 1 tarik Jymmang 2024 da kaba pyndonkam ïa ka pisa hospital ba la pynmih na ka PMJAY-MHIS.
Kane ka jaka ka kynthup ïa ki 6 tylli ki jingthiah NICU kiba don ïa ki jingdonkam kiba kham shalor (Ka jingpynhiar mynsiem kaba khlem da pynhiar bad pynhiar mynsiem, ka CPAP bad ka HFNC) bad ka jaka sumar kyrpang kaba don 10 tylli ki jingthiah ïa ki kmie bad ki khunlung ba dang kha.
Iaki katto katne na ki tiar la bei tyngka da ka MMDSL bad ki additional staff nurse bad ki nongtrei Grade IV la bei tyngka da ka ophis jong ka DHS-MI.
