Jowai, May 21: Ka sorkar jylla kala kner ia ka jingai jingiarap lyngba ka Meghalaya Healthcare Advancement Policy (MHAP) sha ka Dr. Norman Tunnel Hospital ha Jowai, kaba kot T.2 Klur.
U Myntri Rangbah ka jylla u Conrad K. Sangma hynne ka sngi Balang, ula aiti ia ka pisa ha ka wat kaba nyngkong kaba T.1 Klur ia ka hospital. Ia ka pisa kaba dang sah sa T.1 Klur yn sa pyllait hadien ba la dep ban aiti ia ka utilization certificate halor ka jingpyndonkam ia ka pisa kaba la ioh pdiang ha ka wat kaba nyngkong.
Hapoh jong kane ka skhim la ai T.10 Klur ia ki 5 tylli ki Hospital kiba la pyniaid da ki kynhun jong ka jylla.
Haba kren ha ka jingialang u Myntri Rangbah ula pynpaw ba ka sorkar ka iengskhem ha kaban don ia ka jingiatreilang kaban neh slem bad ki hospital kiba don ia ka mishon.
“Kane kam dei satia ka jingai jingiarap kaba tang shisien hynrei kadei tang ka jingsdang ban ban pynneh shi rta ia ka jingiatreilang. Ka skhim ka long kaba iar, ki hospital ki lah ban shim hi ia ka rai kumno ban pyndonkam ia ka pisa ha kano kano ka bynta kaba ki sngew ba ka long kaba donkam tam bad ban pyndonkam ia katei ka pisa”.
Ia kane ka jingialang la pyniaid da u Rev. S. Lamare, uba la pynpaw ia ka jingsngewnguh ia ka jingai jingkyrshan bad ia ka jingbteng ban ai jingiarap na ka bynta ki jingtei bad halor ka jingpule Nurse.
I Dr. D. Nongpluh, Medical Superintendent, ila banjur ia ka jingdonkam kyrkieh ban don ia ka Renal Dialysis Unit, khamtam ba don ka jingkiew kynsan jong ki jingpang kiba iabit.
U Myntri Rangbah ula pynbna ruh ia ka jingthmu ban pynlong ia ka State Level Healthcare Conference ban tei ia ka jingiatreilang hapdeng ka sorkar, ki jaka sumar kiba pyniaid da ki mishoneri bad baroh kiba don bynta lang ha ka koit ka khiah. “Ngi dei ban ia iaid lang shakhmat da ka jingiatreilang, ban iasam ia ki jingnang jingtip, ban weng ia ki jingeh bad ban ai ka jingshakri kaba kham bha” ula ong.
Ula pyntip ruh ia ka jingdonkam ban tuklar ban pynneh ha kaba iadei bad ka koit ka khiah kaba kynthup ban shimkhia ia ka jingkhlad noh jong ki longkmie kiba pun khun bad kane kala long kaba seisoh, ha kaba la lah ban pynduna da 45% ia ka jingkhlad jong ki longkmie kiba pun khun ha kaba iadei bad ka National Average. “Kane kala seisoh kadei eh namar ki sienjam kum ka CM Safe Motherhood Scheme, kaba pynthikna ban khmih bniah thik pa thik ia man la ki longkmie kiba pun khun kiba don hapoh ka jylla” ula ong.
Ula pyntip ruh, ba ka sorkar kala pyndonkam ia ki kor teknoloji bad buddien bad ka khmih bniah ia ka rukom pun khun kaba don hapdeng ka jingma kaba kynthup ruh ban shimkhia ia katei ha ka por kaba biang.
