Baghmara, Lber 04: Ka Baghmara Civil Hospital kaba don ha South Garo Hills, kaba dei tang ma ka, ka jaka sumar jong ka sorkar ha ka District kala treikam palat mynta la bun snem bad shen yn nang pynkhlain ia kane ka jaka ai jingsumar da kaba buh sa 150 tylli ki jingthiah, la pynbna u Myntri Rangbah ka jylla u Conrad K Sangma.
U Myntri Rangbah ula pynbna ia katei hynne ka sngi Nyngkong ha ka jingplie ia ka Academic Block bathymmai bad iaka Girls bad Boys Hostel jongka Captain Williamson Memorial Government College.
Haba ai jingithuh ia ka jingdonkam ban pyniar ia ka jingtei bad ki jingdonkam ha Baghmara ha kaba ki nongpang kiba wan na jngai kum na Maheskola, Mahadeo, Rongara bad Siju kin ioh ia ka jingsumar, u Conrad Sangma ula ong, ba ka sorkar ka tyrwa ban buh sa 150 tylli ki jingthiah lyngba ka Projek kaba thymmai.
“Ngi lah dep ban aiti iaka jingtyrwa sha ka DONER Ministry ha ka jinglut jingsep kaban kot T.15 Klur naka bynta ban kyntiew ia ka Baghmara Civil Hospital khnang ban don sa 150 jingthiah” ong u Myntri Rangbah.
Katkum ka jingtyrwa, u Myntri Rangbah ula pyntip bay n mang sa T.5 Klur naka bhah tyngka jong ka jylla kaban peit ia ki jingtei ia ki jaka sah jong ki doctor, nurses bad ki nongtrei ha ka Hospital.
Ula pynpaw ba ka lah ban don ka jingslem na ka liang ka DONER Ministry ban pynbna ia katei ka projek namar ban long ka elekshon hapoh ka ri bad ula pynpaw ia ka jingkyrmen ba katei ka projek kan sdang ha u snem 2025.
