Shillong, Nohprah 12 : Ka Sorkar Meghalaya Democratic Alliance (MDA) kala ai jingbit ban pynieng ia ka Police Outpost ba thymmai ha shnong Babadam kaba hap hapoh ka Rongram Block, ban ai jingshngain ia ka leit ka wan ki paidbah naka surok National Highway ba pyniasoh ia ka West Bengal bad ka Shillong.
Ka Babadam kaba jngai kumba 22 km na Tura, ka dei ka jaka kaba pyniaid ia ka surok National Highway No-127B ba pyniasoh naduh ka khappud West Bengal-Assam bad iaid lyngba ka Phulbari-Selsella-Babadam sha Nongstoin haduh Shillong.
Ka Tnad Meghalaya Police kala pynbna ban pynkha marmar ia kane ka Police Outpost ba Babadam.
Kane ka National Highway ka dang iaid shaid shaid ha ka jingpyntrei bad shisien bala dep, kan sa long kawei na ki surok ba thnem bha ka iaid ka ieng ki kali na West Bengal, Assam bad kiwei pat ki Jylla sha Jylla Meghalaya bad kiwei kiwei ki Jylla jong ka thain Shatei Lam Mihngi.
Ka Sorkar Meghalaya ka dang tei ruh mynta ia ka Tribal Research Institute ha thain Babadam bad hadiejn bala pyndep ia ka, ki nongwad bniah (researchers) na kylleng ki pyrthei kin sa wan ban iuhkjat bad ban sah ha kane ka thain na ka bynta ki kam wadbniah.
Ka Sorkar Jylla ka dang pyntrei ruh ia ka Medical Skill Hunar Hub ha thain Babadam ka ban long kawei na ki Centre ba hehduh ha ka Thain Shatei Lam Mihngi bad kan ai jinghikai haduh 2500 ngut ki samla pule ryngkat ki hostel, pharmaceutical college, Skill Development Centre bad kiwei kiwei.
Ka Babadam ka dei ruh ka jaka ba ju pynlong ia ka Soba ne jingialang bah ba shisien shisnem jong ka A’chik Baptist Dalgipa Krima (ABDK) ha kaba da ki lak ngut ki riewngeit ki ju leit ban iashimbynta manla u snem.
Ka jingdawa ban buh ia ka Police Outpost ha Babadam ka dei kaba la slem bha namar ka jingiar palat u pud treikam jong ka Rongram Outpost, Selsella Outpost bad Garobadha Outpost kiba hap hapoh ka Tura Police Station, kaba la buh ia ki ha ka jingeh ban tehlakam ia ka jingshongsuk shongshngain ha ka thain baroh kawei.
Ka Babadam Outpost kaba hap hapoh ka Tura Police Station kan don ha shnong Babadamgre ha kaba 31 tylli ki shnong kin hap hapoh u pud u sam jong ka bad kine ki dei-1. Bolmagre 2. Urenggre 3. Saka Dumindikgre 4. Anchenggre 5. Boldamgre 6. Chinaragre 7. Mondagre 8. Dachigre 9. Gambaregri 10. Arangre 11. Sropgre 12. Jongdikgre 13. Rongjigre 14. Balupara 15. Kama Dimikgre 16. Chidaogre 17. Chibokgre 18. Sanchonggre 19. Rangwalkamgre 20. Kemragre 21. Buripara 22. Dojokgre 23. Jongdikgre 24. Galwangre 25. Mikalpara 26. Boldakgre 27. Nawepilgre 28. Dabakgre 29. Agisimgre 30. Chidikgre 31. Adugre.
