Shillong, Nailar 08 : U Myntri Rangbah ka Jylla Conrad K Sangma ha ka sngi Ba-ar, ula pyntip ba u Myntri Rangbah Duh ka Ri Narendra Modi, ula sngew shoh jingmut bha ha prokram jong ka Sorkar Meghalaya ban saindur ia ka lawei ki nongshongshnong ka Jylla naduh ka por ba ki dang don ha kpoh ka Kmie.
Haba iakren bad ki nongthoh khubor hadien ka jingialang bad u Myntri Rangbah Duh ha New Delhi, u Conrad ula pyntip ba u Myntri rangbah ula kmen bha ban iohsngew halor ka prokram jong ka Sorkar ban saindur ia ka lawei ki nongshongshnong naduh ka por ba ki dang don ha kpoh ka Kmie bad ban pynthikna ruh ba ha man ka jingiaid ka rta jong ka jingim ki Khunlung, ka Sorkar kan leh ia la ka kamram ban pynthikna ba kin ioh ia ka jingkyrshan kaba donkam.
“Ka 1000 sngi ba nyngkong ha ka jingim ki Khunlung ka long kaba kongsan bha bad lyngba ki early childhood prokram, ngin ai ia ki jingkyrshan bad ki jingdonkam baroh jong ki Khunlung” ula ong.
Ula pyntip ruh ba lyngba ki sienjam bapher bapher, ka Sorkar kala pyrshang ruh ban kyntiew ia ka rukom im bad ka ioh ka kot jong ki nongshongshnong ka Jylla.
U Myntri Rangbah ula iakynduh ia u Narendra Modi ha ryngkat ki Myntri Sorkar bad u Lamphang ka Iingdorbar Thaw Ain ka Jylla Thomas A Sangma, ha kaba la iakren ruh ia shibun ki kam bad pan ia ka jingkyrshan jong u. Ula aiti ruh ia ka dorkhas sha u Myntri Rangbah Duh ka Ri.
Halor ka jingiakren iasuk bad ka Hynniewtrep National Liberation Council (HNLC), u Conrad ula pyntip ia u Myntri Rangbah Duh ba kane ka kynhun kala pynpaw ia ka jinglong ba kloi ban iakren khlem kano kano ka jingbuh kyndon bad ka Sorkar India bad ka Sorkar Meghalaya, kaban long hapoh ki kyndon jong ka Riti Synshar ka Ri.
Ula pyntip ba namar kane, ka Ministry of Home Affairs (MHA) kala ai dak ia ka Sorkar Jylla ban sdang ia ka jingiakren iasuk bad ka HNLC bad ka Ministry ruh kala kut jingmut ban ai ia baroh ki jingkyrshan bad jingai jingmut ba donkam haduh ban da pyndep ia ka jingiakren.
U Myntri Rangbah ka Jylla ula pyntip ruh ha u Myntri Rangbah Duh ba ka jingiakren iasuk ba pura kala sdang iaid mynta bad ka Sorkar Jylla ka kyrmen skhem b aka jingiakren iasuk kan poi sha ka thong jong ka jingjop.
