Shillong, Nailur 22 : Jan kumba 500 ngut ki Nongrep kila ioh hikai bad kila iarep mynta ia ki jingthung jingtep tang da ka sboh khyndew (natural farming) ha ki 25 tylli ki Shnong katba ka Sorkar ka dang ap ia ka jingmynjur ka Sorkar Pdeng ban nang pyniar ia kane ka kam rep hapoh ka Jylla.
Ia kane la pyntip da ka Myntri ka kam rep Kong Ampareen Lyngdoh haba jubab ia ka jingiatai ba lyngkot bala wanrah da u MLA ka UDP na Nongpoh Bah Mayralborn Syiem, ha ka sngi khatduh jong ka Dorbar Synrai ka Iingdorbar Thaw Ain ka Jylla hynne ka sngi Thohdieng.
Ka Kong Ampareen kala pyntip ba ka Meghalaya State Rural Livelihood Society (MSRLS) kala wanrah ia ka jingai jinghikai halor ka rep tang da ka sboh khyndew ha kylleng ki jaka ka Jylla. Kila iateklok bad ki riewshemphang na Andhra Pradesh bad kila buh haduh 18 tylli ki Farmers Field School bad kila ai jinghikai ruh ia palat 35 ngut ki Community Resource Person (CRP) ki ban leit ai jinghikai ia ki nongrep ba kin sdang ia kane ka kam rep.
Ka Myntri ka pyntip ba palat 475 ngut ki nongtrep kila pyndep ia ka jinghikai haduh mynta bad kila sdang ia ka rep tang da ka sboh khyndew ia ki jingthung jingtep ha ki 500 acres ka jaka ha ki 25 tylli ki Shnong. Hapoh kane ka prokram, ka MSRLS kala buh ruh ia 380 tylli ki Multi Cropped Kitchen Garden.
Ka Kong Ampareen ka pyntip ba ka Tnad kala phah dep ia ka Annual Action Plan ia ka kam rep tang da ka sboh khyndew sha ka Sorkar India ba kan ai jingmynjur.
“Lada mynjur, ka Tnad kan pyntreikam ia kane ka skhim kat kum ka kyndon jong ka National Natural Farming bad nang pynbun ia ki jaka ban rep ia kane ka rukom rep hapoh ka Jylla” kala bynrap.
Haba pynpaw ka kam rep khlem ai dawai chemical lane Organic Farming, ka dei kawei pat ka lynti kaba la pynshlur bha hapoh ka Jylla, ka Myntri ka ong, kumba long mynta, haduh 32000 hectare ka jaka kala don hapoh kane ka rukom rep bad ka Sorkar ka dang plan ban bynrap sa 50,000 hectare hapoh u 2030.
“Kine ki rukom rep kin ym ktah ia ka jingsboh jong ka khyndew bad kan kyntiew ruh ia ka jingpynmih ia ki marrep, ki marrep ki dei ruh kiba iarap ia ka koit ka khiah ki nongbam bad nongpynmih bad ka pynioh ruh kham bun ka kamai kajih ia ki nongrep” kala ong.
Halor kine ki kam rep hapoh ka Jylla, ka Kong Ampareen kala pyntip ba ka Tnad kala pyntreikam ia ka Mission Organic for Value Chain Development-North East Region (MOVCDNER) bala bei tyngka da ka Sorkar Pdeng ha kaba haduh 28 tyli ki FPO la dep ban buh bad kila rep da ka rep khlem ai dawai chemical.
Ka pyntip ba ka Kynhun Myntri ka Sorkar Jylla ruh kala mynjur ia ka Meghalaya State Organic and Natural Farming Policy ha ka 11 tarik Kyllalyngkot 2023.
Ka ong ruh ba da ka jingthaw ia ka Meghalaya’s Natural and Organic Society for Livelihood and Innovation in Agriculture (MEGNOLIA), ka dei ka sienjam ba kongsan bha ha ka lynti iaid jong ka Jylla ban long ka nongialam ha ka jingpynmih ia ki marrep ba khlem khleh dawai hapoh ka Ri.
