Nongpoh, Iaiong 12 : Kawei ka Longiing kaba duk bha jong ka Shnong Umsarang, kala ioh mynta ia ka Iing thymmai kaba paka da ka jingisynei lem jong ka seng Federation of Khasi Jaintia & Garo People (FKJGP)-Umling Circle.
Ka seng FKJGP kala aiti ia kane ka Iing kaba la pynshna sngewbha, sha kane ka Longiing hynne ka sngi Thohdieng.
Kane ka Longiing ka dei jong ka Kong Martina Shadap kaba don 5 ngut ki Khun bad kaba im hapdeng ka jingjynjar bad jingkordit namar ka jingbym don ia ka Iingsah kaba bit kaba biang.
Ia kane ka Iing thymmai la aiti sha ka kong Martina Shadap da u President ka FKJGP-North Khasi Hills Bah Luistar Lyngdoh ha ka jingiadonlang u Bah Marshal Diengdoh, Vice-president FKJGP Ri Bhoi, u Bah Banroy Wahlang, President ka FKJGP Umling Circle lem bad kiwei ki dkhot ka seng.
Ka kong Martina ka la pynpaw ia ka jingsngewnguh kaba khraw ia ka seng FKJGP kaba la iohi bad sngewsynei lem ia ka bad ia ki Khun ki Ktikiba ju shong ju sah ha ka iing kaba jot ba pei.
