Shillong, Nailar 19: Ka Ophis u Deputy Commissioner (DC) East Garo Hills ka la pynmih ia ka jingmaham kaba tyngeh hadien ka jinglap ba ki nongpyniaid ia ka Common Service Centre (CSC) ki la ai ia ki syrnod Scheduled Tribe (ST) ba beain sha ki riew shimet khlem da ioh bor naki bor ba dei khmih.
Katei ka kam, ka la paw pyrthei, hadien ba la lap ia kawei na ki syrnod thok, ha ophis DC Williamnagar ha ka por ba pynrung kyrteng Aadhaar. Ha ka QR code Scan la lap ba ka ST certificate ïa kaba la kynnoh ba la ai da u Jonathon B Sangma, Manager ka Rainbow CSC, Rongsak, ka dei kaba thok.
“Uwei na ki briew uba la ïoh ïa ka syrnod Schedule Tribe be-aiñ na kane ka CSC u la wan sha ophis u Deputy Commissioner, East Garo Hills, Williamnagar ban pan Aadhaar Card ha kaba ïa ka ST certificate thok la lap da u nongpynïaid Aadhaar ha ka por ba scan ïa u QR code. Ka jingleh ki nongpyniaid iaka CSC ka long kaba beain” pyntip u DC.
Ki bor district ki la ong ba katei ka kam bala leh daka CSC ka long kum ka kam runar kaba shyrkhei bha.
U DC u la maham ba lada lap ïa kino kino ki CSC, ki cyber café, ki kiosk ne ki browsing centres kiba ai ïa ki syrnod ST/SC, ki court orders naka bynta ki birth certificates, income certificates, permanent residence certificates, kito kiba donkti kin shah pynngat ha ki kyndon aiñ katkum ki kyndon Sections 319(2), 335, 234 and 337 jong ka Bharatiya Nyaya Sanhita (BNS).
U DC u la maham shuh shuh ba kino kino kiba leh ia kum kine ki kam beain kin shah pynngat hapoh ki kyndon ain.
*****
