Shillong, Iaiong 08 : Ka Meghalaya kala sdang ia ka 2nd NECDC Senior Women’s Inter State Tournament da ka jingjop ba 33 run pyrshah ia ka Mizoram ha ka jingialang sdang jong ka.
Ka Captain Debasmita Dutta kala ialam hi nakhmat da ka jinglah kamai 28 runs bad shim haduh lai wicket. Ka samla Daiaka Emigale Warjri kala pyniap biej da ka jingkawang bol bad shim lai wicket katba ka samla Indariakor K Wannlang kala shim ar wicket, kaba pynlong ia ka Mizoram ban hap lut ki wicket tang da ka jinglah kamai ba 79 run haba beh ia ka thong bala buh da ka Meghalaya kaba long 112-6.
Haba phah tied nyngkong, ka Meghalaya kala sdang da ka jingtied bha hapdeng ka Luiza Tamang bad ka Dutta kiba la kamai 51 run tang hapoh ka 43 ball.
Ka Dutta kala hap nyngkong lyngba ka jingkawang bol ka Zothansangi bad ka wicket kaba ar ruh kala bud tang hadien khyndiat por.
Da ka jingdon ka Luiza ha madan bad haba ka Ankita Sarma kala sdang tied, la iohi kumba ka Meghalaya kan ioh buh ia ka thong ba kot kumba 160 runs. Hynrei da ka jingiai bteng ka hap wicket kynthup ka jinghap wicket noh ka Luiza ha ka over ba 14, kala pynduna noh ia ka jingkamai runs. Ka Luiza kala kamai 34 runs na ki 27 ball, da ka jinglah ban tied ia 3 tylli ki six bad artylli ki boundary.
Haba beh ia ka thong, ka Mizoram kam shym la lah ban tied bha bad ki nongkawang bol ka Meghalaya kila ioh ban shim wicket kloi bad pynbud kawei hadien kawei pat. Nalor ka Felfeli Pautu kaba kamai 31 runs, ym shym la don satia kiwei pat ki nongtied ban lah shong slem ha madan.
Kane ka jingshah rem ka mut ba ka Mizoram, kaba la shah rem arsien ha ka jingialehkai group, kala don shabar mynta na ka jingiakhun.
U Bah Rayonald Kharkamni, Honary Secretary ka Meghalaya Cricket Associaion (MCA) ula sam ia ka khusnam sha ka nongialehkai Debasmita Dutta kaba shah jied kum ka Player of the Match ha kane ka jingiakhun.
