Shillong, Naitung 28: Ka St Anthony’s Higher Secondary School ka la bat biang ia ka nam lahduh haka thup ki shynrang lane Boys’ Team Champions, katba iaka nam lahduh jong ka Girls’ Team Champion la rah daka Auxilium Girls’ Higher Secondary School haka 31st Inter School Karate Tournament 2025.
Ka St Anthony’s Lower Primary School ka la wan ba-ar haka thup ki khynnah shynrang bad ka Providence School ka la wan ba-ar haka thup ki khynnah kynthei.
Ia ka lympung karate ba lai sngi la pynlong da ka All Meghalaya Karate-Do Association naduh ka 24 haduh ka 26 tarik Naitung lyngba ka jingkyrshan jong ka Directorate of Sports and Youth Affairs ha Multipurpose Indoor Hall, SAI, NEHU Shillong.
Ha kane ka lympung ïalehkai la wan shim bynta haduh 748 ngut ki nongïalehkai karatekas na ki 104 tylli ki skul na Khasi-Jaiñtia Hills bad Garo Hills.
Watla ka long kaba eh ia ki nongpyniaid ban pyndap ia kiba bun ki nongialehkai karateka, hynrei ka AMKA kala shimkhia ban pynthikna ba iwei pa iwei ki khynnah naduh 6 snem shaneng ki ioh ia ka lad ban pyni iala ka sap.
Ha kane ka sngi ba kut ka wan sakhi da u Myntri Sorkar u Bah Paul Lyngdoh haka jingdon lang u General Secretary ka Meghalaya State Olympic Association u Bah Finely L Pariat bad u Chief Accounts Officer jong ka Meghalaya Energy Corporation Ltd u Bah Aiborlang Shabong.
Ki kongsan ha kane ka sngi ki la sam ïa ki khusnam shaki nongjop bad ki kynhun ba jop kynthup Best Karatekas ha ka kyrdan jong ki khynnah shynrang bad kynthei.
U Bah Paul Lyngdoh u la pynpaw ka jingkmen ban iohil ïa ka sap ba la pyni da ki nongïalehkai karate bad u la ong ba u thikna ba kin sa ïoh ïa ki takma na ka bynta ka Meghalaya bad ka India ha ka por kaba biang.
Ki nongjop ki kynthup Best Karateka (Boys Junior)-Royal Jayden Laloo (Seven Set Higher Secondary School), Best Karateka (Boys Senior) -Daniel Dabiangbha Warjri (St Anthony’s HS School), Best Karateka (Girls Junior)-Princey A Blah Pohti (Pine Mount School), Best Karateka (Girls Senior)-Iwannaki L Khongji jong ka St Anthony’s HS School.
