Shillong, February 7: Ka Mumbai City FC kala pynrem ia ka NorthEast United FC da 2-0 ha ka jingiakhun jong ka Indian Super League (ISL) 2024-25 hynne ka janmiet ha Jawaharlal Nehru Stadium, Shillong.
Kane ka jingialehkai ka dei ha ka sien kaba nyngkong ban pynlong ia ka ISL hapoh ka nongbah jong ka jylla ha kaba u Myntri Rangbah ka jylla u Conrad K Sangma ula wan ban sakhi ia kane ka jingialehkai kaba la dap smam da palat 14000 ngut ki nongpeitkai.
Ka NEUFC kala mad ia ka jingrem kaba nyngkong hadien ka jingjop kaba 8 sien kynthih.
Mar ia sdang ka jingiakhun ha ka minit kaba 8, ka NorthEast United FC kala pyrshang ban thaw ia ka lad ban ioh thep kol ha kaba u Macarton Nickson ula shut ia ka bol kaba la leit ha u Alaaeddine Ajaraie hynrei haba ula pyndei da ka khlieh ia katei ka bol kam shym la rung satia shapoh kol.
U Ajaraie ula bteng ban ialehkai bha kaba la buh ha ka jingma ia ka Mumbai City FC, ha kaba u Michel Zabaco ula pynbuh ia ka bol ia u Ajaraie hynrei haba ula shut ia ka bol kala leit pynban sharud.
Ka NEUFC ka la ioh biang ia ka kabu ha ka minit kaba 26 ha kaba u Mohammed Ali Bemammer ula kynjat ia ka bol sha u Ajaraie hynrei u Ajaraie ula pynlehnoh ei biang ia katei ka kabu ha kaba ka bol kaba ula shut kala lait sharud tang khyndiat bha bad 2 minit hadien kane u Ajaraie ula pashat ia ka bol sha u Nestor Albiach hynrei ia ka bol kaba ula shut la ioh ban kem noh da u Phurba Lachenpa ba kan ym ioh rung shapoh kol.
Hynrei ha ka minit kaba 41, ka Mumbai City FC kala ioh thep ia ka kol lyngba u Bipin Singh uba la pyndei ia ka bold a ka khlieh kaba la leit rung beit beit shapoh kol.
Ha ka kylla miet ka jingiakhun kala long kaba itynnad hynrei ha shwa ban kut ka jingiakhun ha ka 90+2 ka Mumbai City FC kala ioh thep ia ka kol lyngba u Chhangte kaba la pynskhem ia ka jingkhur ia ka jingjop bad ia ka 3 point.
Ka NEUFC kala pyrshang ban thaw ia ki lad ban ioh thep kol hynrei namar ka jingkhlain ki rangialehkai kiba shadien jong ka MCFC kam shym la iohlad ban thep kol watla ka NEUFC kala ioh ban shut sha kol haduh 17 sien, hynrei ka MCFC kala ioh lad ban shut sha kol tang 5 sien.
Ka NorthEast United FC kan leit ban iakhun pyrshah ia ka Jamshedpur FC ha ka 13 tarik u Rymphang, katba ka Mumbai City FC kan iakhun pyrshah ia ka FC Goa ha ka 12 tarik u Rymphang.
Ka Mumbai City FC mynta kala ioh khur 31 point bad don ha ka kyrdan kaba 4 katba ka NorthEast United FC kala ioh khur 29 point bad don ha ka kyrdan kaba 5.
 2024-25 hynne ka janmiet ha Jawaharlal Nehru Stadium, Shillong.){kind=link}