Dimapur, Rymphang 25: U Myntri Rangbah (CM) ka Assam u Himanta Biswa Sarma ha kane ka sngi Palei ba la lah u la ong shibun bah ki kam la lah ban pyndep na ka bynta ka jingiakren iasuk jong ki Naga bad kine ki san snem ki ban wan ki long kiba kongsan na ka bynta ban lah ban wanrah ka jingseisoh.
U Sarma u ba dei ruh u convenor jong ka NEDA u la pynlong ka jingiamir jingmut bad ki kynhun jong ki jaidbynriew Naga na ka bynta ban lah ban weng noh ia ki jingeh kiba la neh da ki bun phew tylli ki snem.
Haba aijingkren ha ka jingialap ilekshon ha Nagaland, u Sarma u la ong; “Ngi la pynlut ia shibun ka por ka bor na ka bynta ban leh ban weng noh ia ki jingeh sain hima jong ki Naga bad ngi la shim ia shibun ki sienjam, bad kine ki san snem ki ban wan ki long kaba kongsan na ka bynta ban pynurlong ia kine ki jingangnud baroh.Ngi kwah ban shim ia ki sienjam ki ban weng ia kine ki jingeh da kaba burom ia ka jinglong kyrpang jong ki paid Naga bad ia ka histori ka jong ki bad ruh ban ithuh ia ka jingiadei kaba khlain hapdeng ki jaidbynriew Naga bad ki briew kiba shong ba sah ha kiwei pat ki bynta jong ka ri India.”
Nalor kata u la ong ruh; “Ngi dei ban ngeit ba ryngkat lang ngin lah ban kyntiew ia kane ka thain shatei lammihngi (Northeast) bad ban weng noh ia ka jingduk jingkyrduk na kane ka thain, ban kyntiew ha kaba iadei bad ki lynti surok, lyntei rel bad liengsuin kumjuh.”
Na ka liang ka sorkar pdeng ka la pynlong la ki jong ki jingiakren bad ka seng kieng atiar NSCN-IM naduh ka snem 1997 bad na ka liang ka Working Committee jong ka Naga National Political Group (NNPG), kaba kynthup ia kumba hynniew tylli ki kynhun.
