Shillong, Nohprah 05: Ka Nongialam ka NPP bad Myntri Sorkar Kong Ampareen Lyngdoh ha ka sngi Palei, kala ong ba kan ym pdiang satia ia kano kano ka jingiakren la ka long ne em kaba kloi ban leit phai biang sha ka seng Congress.
Haba iakren bad ki nongpathai khubor, ka Kong Ampareen kala ong “Ngam tharai ba ngan kwah ban don ka jingiakren badno badno ruh. Ia mynta hi nga don bad ka NPP. Ngan ai ia kaba bha tam sha ka NPP kat kaba nga lah ban leh. Ngan ym pynkulmar jingmut ialade na ka bynta katei. Ngan shakri ia ki paidbah jong ka jylla bad ia ki paidbah ka constituency.”
“Nga lah shakri ha ki samoi treikam ki jong nga ha ki kyrdan bapher katkum ka jinglah ka jong nga ha baroh ki seng saiñ pyrthei kiba nga lah don. I Pa jong nga ruh ila iaid lyngba kiba bun ki jingkylla ha ka jingim namar katkum ka jingdawa ka por. Ngi iai bteng ban aiti lut ha kano kano ka seng sain pyrthei kaba ngi pyniasoh ialade. Lada don kino kino kiba pyrshang ban khroh ia ngi, ngi ngim bna eiei bad ngim don jingtip eiei. Nga dang don sa shi snem shiteng ban leit sha ka samoi kaban sa wan. Balei ki briew ki don ia ka jingsngewtynnad ban don biang ia ka elekshon? Balei phim ailad ia ngi ba ngin trei nyngkong shwa ia ka kam? kala ong.
Ka Kong Ampareen Lyngdoh kadei kawei napdeng ki 5 ngut ki MLA barim ka Congress, kiba la shah suspon halor ka jingshim rai ban kyrshan ia ka Sorkar MDA-I kaba iadonlang ka BJP hashwa ban long ka elekshon MLA ha u 2023.
“Phi dei ban pdiang ba nga iohi ia ki jingthoh ha ki kynroh bad nga lah iathuh lypa ba baroh kin sa mih lut na kawei ka seng (Congress) namar ba kim shym la shimkhia ia ki jingkwah, jingdonkam ki jong ngi bad ki jingai jingmut ha ka lynti jong ka synshar paidbah” long ka Myntri Sorkar.
Kala ong ba kan ym don bynta ha kino kino ki kam kiban iadei bad ka seng Congress.
“Nga dei kaba don ha ka NPP, kam shah ia nga bad kam long kaba dei bad ngan ym treh ban iadonbynta. Nga long kaba kmen bha mynta bad nga sngewnguh ba kiei kiei baroh kiba jia ha ka MDA bad ngam iohi ban don kano kano ka daw, kumta balei ngan shu pdiang ia kano kano ka jingiakren badno badno ruh” kala ong.
Kala pynpaw ruh ba la ka seng Congress ka donkam ne kam don kam ia u kapten uba biang kan shong beit ha ki ban shim ia ka rai.
