Shillong, Lber 22 : Ka Shlem, ka lad pathai khubor digital, ka ieng skhem ha ka khubor kyndang ATM ki runar ba donkti lang u Kynum jong u MLA ka Mawlai, Bah Brightstarwell Marbaniang bad kum ka lad pathai khubor, ka pynpaw ba kam don eiei pyrshah ia u MLA ne ban ktah mationg ne pynjah burom ia u shimet.
Kane ka long hadien ba u MLA ula phah ia ka legal notice sha ka Shlem news, ba kam ba ka pynjah burom ia u bad dawa ban weng noh ia ka kyrteng jong u bad kumjuh ruh ban pan map.
Kane ka notice bala phah da u nongsaid ain u MLA, Betlumlang Nongbet ha ka 17 tarik Lber, kala kubur ba u nongshah kynnoh (uba shah kem) u dei uba don jingiadei bad u MLA lyngba ka kam shong kurim bad ong ba ka jingpynpaw ia ka kyrteng u MLA ka dei ka “bym donkam bad bym shonghok” naba um dei satia uba shah kynnoh lang lane suba donkti lang da ki Pulit.
“…..watla uba nongshah kynnoh (accused) u lah ban don jingiadei bad u briew ba aikam ia nga (client) lyngba ka kam shongkurim, kum kane ka jingiadei ka dei ka kam shimet bad kam don jingiadei eiei ruh em bad ki jingkynnoh kam bymman ba paw ha ka khubor” ong ka notice.
U Editor ka Shlem u pynpaw ia ka jingsngewsih ba ka khubor bala pynmih ka pynmong ia u MLA, haba pynshai baka khubor kam don jingthmu satia ban pynjah burom ne pynthohbria ia u MLA bad kam shym la don ruh kano kano ka jingkynnoh pyrshah ia u MLA lait tang ka jingkdew ba u briew ba kynnoh donkti kyndang ATM u dei u kynum jong u MLA.
Ka daw hi ka long ba kat kum ka khubor ki Pulit, ka kynhun Pulit kala leit khynra (search) ia ka Iingsah jong une uba shah kem, uba dei u Kurim ka hynmen/para u MLA, kaba dei ruh ka Iingkmie jong u MLA kaba don ha Mawlai Nongkwar.
Ka shlem ka kdew ia ka hukum jong ka Delhi High Court ba ong ba ki nongthoh khubor kim hap ban shim ia ka jingkit khlieh ban shah pynngat mukotduma pynjah burom haba ki pyntip ia ki jingshisha da kaba thikna. Ka ïingbishar, ha ka mukotduma jong u snem 2021, ba ïadei bad ka nongthoh khubor Nilanjana Bhowmick, ka la ong: “Ka rukom ba u nongthoh khubor ne u nongthoh article u pynpaw ïa ki jingshisha ka dei ka jingtbit jong u ban thoh, hynrei haba ka mat ba la pynpaw ka long kaba shisha, ym lah ban khot ïa ka kum ka kam pynjah burom.”
Kaneka kam ka iadei bad ka jingshah kem ki hynriew ngut ki briew halor ka jingkynnoh donkti ban kyndang ia ki ATM ha East Khasi Hills, kiba la ioh rong ei ia ka pisa ba jan kot T.1 klur. Kane ka jingjia ka dei kaba lajia hapdeng u bnai Jymmang 2025 bad Rymphang 2026. Kiba shah kynnoh ki kynthup ia arngut ki nong Haryana bad arngut ki trai shnong.
