Shillong, Naiwieng 12: Ki samla pule ka skulbah NEHU kila ban jur ba kin nym pynjynsur satia ïa ki mat jingdawa jong ki ba kynthup iaka jingdawa ba u Vice Chancellor (VC) Prof PS Shukla un hiar shuki mardor.
Ka jingshong shah thngan ki samla pule ka skulbah NEHU kala jam shaka sngi kaba 8 ha kaba 12 ngut ki samla pule ki la poi sha hospital hadien ba kila sdang tlot bor met.
“Na ki 12 ngut ki samla pule kiba la shah pynkit sha Hospital, 2 ngut ki dang don hapoh ka jingpeitngor jong ki doktor ha Hospital” la ong uwei na ki samla pule uba dang shu wanphai na Hospital.
Hadien ka jingwan phai na Hospital, baroh 10 ngut kila wan biang shaka jaka shah thngan ha phyllaw ka Administrative Block ban bteng iaka jingiakhih jong ki lem bad kiwei ki para samla pule.
Haduh mynta ka jingshah thngan khlem pud sngi bad ka jingkhang khyrdep iaka skulbah NEHU ka dang ïai bteng, kaba la pynlong ïa ki klas ban sangeh noh ha kane ka skulbah.
Haba kren sha ki lad pathai khubor, u President ka KSU NEHU Sandy Sohtun u la ong ba baroh ki samla pule ka NEHU bad ki samla pule na ki jaka pule bapher bapher na Meghalaya bad shabar ka Jylla, ki la ai ka jingkyrshan ia ka jingiakhih kaba dang iaid ha NEHU.
“Wat hadien 8 sngi ka jingshah thngan, ngi dang ieng skhem beit ha ka jingdawa jong ngi ba u Vice Chancellor (VC) u dei ban hiar shuki noh bad u dei ruh ban wengkam ia u Registrar bad u Deputy Registrar” la ong u samla Sandy.
U samla Sandy u la pyntip ba ka NEHUTA bad ka MeTTA lem bad ka NEHUSU kila thoh daka shithi shaka President ka ri India bad sha u Myntri ka Sorkar Pdeng ba dei peit ïa ka tnad pule puthi ha ka 11 tarik Nailur, ban phah tuklar halor ka jingeh kaba dang ïaid mynta ha NEHU.
U la pyntip ruh baka NEHUTA bad ka MeTTA kila kynduh ia u Lat ka jylla u CH Vijayashankar ha ka 12 tarik Naiwieng.
“Watla ngim shym la ioh kano kano ka jingkhot kaba pura na u Lat hynrei ngi khmih lynti ba shen, u Lat un khot ia ngi ban iakren halor ka kynrum kynram kaba dang iai bteng mynta ha NEHU” u la bynrap.
 Prof PS Shukla un hiar shuki mardor.){kind=link}