Shillong, 20 Nailar: Ka Seng Samla Mawkhar ryngkat bad ka NRE Pageant India pvt LTD ha ka sngi Saitjaiñ kila pynlong ïa ka jingialap paidbah halor u drok bad ki lad ban ai jingsumar ia kiba kyrni da ki dawai kynbat.
Ia kane ka jingialang la pynlong ha Community Hall jong ka Dorbar Shnong Mawkhar bad ka dei ruh shibynta jong ka jing rakhe ka Seng Samla Mawkhar ia ka jingdap 25 snem ka seng.
Ka Director ka tnad Social Welfare Kong C D Lyngwa kala wan iashimbynta kum ka Kongsan ha ka jingiadon ryngkat u Psychologist, DMHP, EKH, MIMHANS Bah Trueman Basaïawmoit, u Ayurveda Practitioner Naturopathy Tenzing Tsering na New York, USA, u President ka NRE Pageant India pvt LTD Bah Ransom Sutnga, u President ka Seng Samla Mawkhar Bah Daniel Syngai bad kiwei kiwei kiba la shah khot sngewbha.
Ka Kong CD Lyngwa haba kren kum ka Kongsan kala ai jingbatai shaphang ka DREAM projek jong ka Sorkar jylla ban ialeh ban rat dyngkhong ïa ka jingdih drok,
Kala ong, ba ka jingjur bad jingkynrei ka jingdih drok kadei ka daw ba kum ki kmie kpa kim don ka jingkitkhlieh ïa la ki khun bad ka jingjur palat ka jingpep skul shiteng por ki khynnah. Ka jing bym biang ka sumar sukher ki longkmie longkpa ka pynlong ruh ka jingshongkha khynnah khlem da sngewthuh ïa ka rukom ka jinglongkmie longkpa, kane ka dei kawei na ka daw kaba la wanrah ïa ka jing kynrei ka jingpyndonkam ïa u drok.
U Bah T Basaïawmoit u la ai jingbatai shaphang ka daw jongka jingdih drok bad ruh ka jingma kaba mih na u drok bad ka daw jong ka jingdih drok kadei namar ka jingbun ka jingpynbor na ki paralok. Ula ong ba kane ka jia kynrei bha ha ki khynnah ba 14 haduh ka 29 snem ka rta bad ruh ka jingïakynduh jingjynjar ha ki ïing ki sem.
Na ka liang u Tsering u la pyni ruh ïa ka rukom khleh ïa ki dawai kynbat kiba lah ban pynkhreh hi ha la ki ïing ki sem.
Katba u Bah Ransom Sutnga ula kyrpad ïa kito kiba ngop ha ka jingdih drok ne kiwei pat ki jingdih pynbuaid ba kin wan shah sumar lyngba ki dawai kynbat ha ka jaka sumar kaba don hapoh ka Sound & Vision, Thana Road, Police Bazaar, Shillong.
Pule lang ia kane: Kurup ki Pulit ia u heroin ba shongdor haduh T. 2 klur
Peit lang ia kane
Ka rynsan khubor digital ba pura ka Meghalaya da ka ktien Khasi.
Balei ban ap ia ka lashai, haba ki khubor ki mih mar syn jia!
Bud ia ka Ki Khubor na ka Shlem ban ioh ia ki khubor ba dang shu jia bad ba thymmai!
