Imphal, Iaiong 15:U MLA ka BJP na Heirok constituency ka Manipur, u Thokchom Radheshyam Singh u la iehnoh kam kum u advisor ne u nongai jingmut na ka bynta u Myntri Rangbah (CM) N. Biren Singh ha kane ka sngi Palei ba la lah.
Ha ka shithi iehnoh kam, u Singh u la pynpaw ba um shym la ioh satia ia kano kano ka jingbahkhlieh lane kano kano ka jingiasyllok naduh ba la thung ia u ha kane ka kam.
Nalor kata u la pynpaw ruh ia ka jingangnud ban pynleit jingmut ha kaba iadei bad ka ilekshon Lok Sabha ka ban long ha u 2024, bad ha kaba iadei bad ki kam pynroi hapoh la ka jong ka constituency.
Nalor kata, ha ka video ba la pyllait lyngba ka Facebook, u Thokchom Radheshyam Singh u la pynpaw ruh ka jingbym sngewhun ha kaba iadei bad ka rukom treikam jong ka sorkar.Ha kajuh ka por u Singh u buh ka jingkyrpad ia baroh ki riewsain hima ba kin pynioh pat ia ka jingshaniah jong ki paidbah. “Ki paidbah ki la duh noh ia ka jingshaniah ha ki nongialam sain hima namar kiba bun na ki, ki shu kut tang ha ki jingkular,” ong shuh shuh utei u nongmihkhmat ka BJP.
Shuh shuh u Singh ha ka video u la aijingmut ruh ban khmih bad bishar bniah ha kaba iadei bad ki jingiamynjur bad ki jingiateh kiba iadei bad ki kam jaka puta kiba dei naduh kine ki hynriew snem ba la dep bad ban wanrah ha ka jingtip jong ki paidbah.
“Kane ka bynta ka la wanrah ka jinglehrain na ka bynta kito kiba angnud ban trei na ka bynta ka bha ka miat jong ki paidbah,” ong u Singh u ba dei ruh u ophisar IPS barim.
