Rai iakhun noh kum u kyrtong shimet na Mahendraganj
Shillong, K’lyngkot 23 : U Bah Serazul Kharkongor, u rangbah uba la rai ban mih iakhun ia ka elekshon MLA-2023 na Mahendraganj constituency, ula iehnohkam kum u dkhot ka United Democratic Party (UDP) namar ka jingleh meng ki Nongialam ban pynbna ia u kum u kyrtong.
Ka UDP ia mynta kam pat don kyrtong satia ki ban mih iakhun na Mahendraganj, kaba mihkhmat da ka Dikkanchi D Shira, kurim u Myntri Rangbah barim ka Jylla Dr Mukul Sangma.
U Bah Serazul uba aiti ia ka shithi iehnohkam sha ka UDP naduh ka 19 tarik Kyllalyngkot bad ia kane ka shithi la phah beit beit sha u President Bah Metbah Lyngdoh. U Bah Serazul ula pynkhreh mynta ban aireng noh kum u kyrtong shimet na kane ka Constituency ba don ha khappud ka Bangladesh.
Lah ban kdew hangne ba ka UDP-South West Garo Hills kala phah ia ka kyrteng u Bah Serazul sha ka State Election Committee ka UDP hynrei la pyntip ba ki Nongialam kim pdiang satia.
Kat kum ka khubor ba ioh, la iathuh ba ki Nongialam ka UDP – South West Garo Hills kila rai ban ai ka jingkyrshan ia u Bah Serazul bad ban leit iashimbynta ruh ha ki jingialang ialap elekshon ha kine ki sngi ban wan.
