Shillong, Rymphang 01 : U Myntri ka Tnad PHE Marcuise N Marak ula pyntip ba ka jingpyntrei ia ki katto katne ki project hapoh ka Jal Jeevan Mission (JJM) ha Ri-lum Jaintia bad East Khasi Hills, kila iatakhuh mawsiang bad shah ktah namar ka jingbym lah ban ioh ia ka bording elektrik.
Kat kum ka jingong jong u, kane kala jia namar ba bun na kine ki project ha Khasi bad Jaintia Hills ki dei ki pumping project bad ki donkam ia ka bording ban tan ia ka um sha ki kor um iing.
“Namar kata, ngi la bthah ia ki Ophisar ka Tnad ba kin iakren bad ki heh ka MeECL bad ba kin iatreilang ruh bad ki” ong u Marak.
U bynrap “Bun ki project, ka jingsiew ia ka bai bording ka dei kaba la dep ban leh hynrei ngi dang ap ia ka jingtan ia ka bording, ka daw ka dei namarba katto katne ki dei kiba jngai na u main line. Ki donkam ia ki tiar kum u post, ki waiar…ngi la pyntip ba ngi dang pynkhreh ban thied ia ki…kine kidei ki jingeh bad nga tharai ngin sa lah ban pynbeit noh ia ki”.
Haba kylli, u Marak ula ong ba shen un sa rah iakren ia kane ka kam bad u Myntri Rangbah ka Jylla Conrad K Sangma ba un tuklar lang.
“Ngan sa kyrpang ia u (CM) ban pynlong ia ka jingialang hapdeng ka Tnad bording bad ka PHE khnang ba ngin lah ban pynbeit noh kham kloi ia ka kam” ula bynrap.
Ha kajuh ka por, u Myntri ula pyntip ba 73.69% n aka 6.51 lak tylli ki Longiing kila ioh ia ka kor um iing kaba treikam hapoh ka JJM.
“Ngi khmi lynti ban pynpoi 100% ka jingpynpoi kor um iing hapoh u bnai Lber mynta u snem. Ngin peit ia kaei kaba ngi lah ban leh” ula ong.
