Shillong, Iaiong 11: Saw tylli ki Sengbhalang kila mih ban iatreilang bad sdang ia ka jingialap paidbah ban dawa ia ka Sorkar Jylla ban wanrah ia ka jingpynkylla ia ki kyndon jong ka Meghalaya Succession of Self Aquired Property (Khasi and Jaintia Provission) Act, 1986 ban pynthikna ia ka jingsam bhah mar katjuh ia ki Khun Kynthei bad Shynrang na ka spah jong ki Kmie Kpa.
Kine ki saw tylli ki Seng ba kynthup ia ka Maitshaphrang Movement, KSU, FKJGP bad HNYF kin sa lum ia ka jingialang jong baroh ki Kur bad ki paidbah ka Ri-lum Khasi Jaintia ban pynsngewthuh halor kane ka jingdawa. Kane ka jingialang kan long ha ka 15 tarik Iaiong ha Jaiaw Shyiap Community Hall ha ka por 11 baje mynstep.
“Kam dei ba ngi khot tang ia ki Kur hynrei ngi ia wer ia baroh ki Rangbah, Longkmie bad Samla ba kin ia wan lang ban pynsngewthuh iaki, halor ka jingdawa ka jong ngi ban thaw iaka Aiñ ban ai bynta lem ia ki khun shynrang bad kynthei haka jingioh pateng iaka Self Acquired Property & Ancestral Property” ong u Nongialam ka MSM u Bah Micheal Syiem ha ka ba la iadonlang u President ka HNYF u Bah Sadon K. Blah, u nongialam ka FKJGP Bah Elton Warjri bad u Assistant General Secretary ka KSU u samla Eric Nongkynrih.
“Ki kmie ki kpa ki lah ban ai iaka jingdon jingem jongki sha ki khun shynrang bad khun kynthei hynrei ha ki khun pat kam dei shuh ka Self Acquired Property hynrei kala dei noh ka Ancestral Property bad kane ka iaid sha ka khun khatduh. Ngi kwah ba ia kane ka aiñ jong u 1986 dei ban pynkylla noh da kaba pynrung lang ia ka Ancestral Property ia kaba ki khun ki lah ban ia ioh bynta lang baroh” ula bynrap.
Ula pynshai ba ha kaAiñ la kdew ba dei tang ka khun khatduh kaba la lah ban ioh pateng iaka jingdon jingem lyngba ka Dulir hynrei ym shim la kdew eiei ba ki kmie ki kpa kin lah ban ai bynta lem ia baroh ki khun bad kan shong ruh ha ka jingstad jong ki kmie ki kpa ha kano ka rukom ki ai bynta lem ia baroh ki khun iaka jingdon jingem ka jongki.
U Bah Micheal Syiem ula iathuh, ba mynta la 20 snem tam kila pynsngewthuh ia ki paidbah halor katei ka mat lyngba ki prokram ki bapher bad ka jingsam ia ki kot lyngkdop bad mynta bun ki briew kila wan shakhmat ban ioh iaka jingpynshai ha kaba iadei bad ka kyntien ban ai bynta lang ia ki khun bad mynta kila ai jingkyrshan ia kane ka jingdawa na ka sorkar.
U Chairman ka MSM ula pynshai ruh ba kim shym la kren eiei iaka jinghiar pateng jong ka spah ka phew kaba dei jong ka Kur hynrei ka jingiakren ka long thik tang ha kaba iadei bad ka jingdon jingem kaba shimet jong ki kmie ki kpa.
