Iatehkular ka NPP bad ka Sorkar NDA tang ban wan ki kam pynroi ha Jylla : Prestone

Shillong, Rymphang 11 : U President ka National People’s Party (NPP) Meghalaya bad Symbud Myntri Rangbah Bah Prestone Tynsong ha ka sngi Ba-ar, ula pynshai ba ka jingiateh kular hapdeng ka NPP bad ka Sorkar NDA ba ialam da ka BJP ha Delhi, ka dei thik tang na ka bynta ki kam pynroi hapoh ka Jylla.

Haba kren ha ka rynsan ialap elekshon ban pan jingkyrshan ia ka MDC kong Macdalyne S Mawlong ha Umsning, Ri-Bhoi, u Bah Tynsong ula ong “Ka roi ka par jong ka Jylla ka dei ka daw ba ka NPP kala iateh kular bad ka Sorkar NDA”.

Haba kyntu ia ki paidbah ba kin ym shah ialam bakla da ki jingkynnoh ba ka NPP ka dei ka BJP, ula ong ba hadien ka jing shimti ia ka Sorkar Jylla ha u snem 2018, ka NPP ka don tang kawei ka mat treikam bad kata ka long ban shakri ia ki paidbah jong ka Jylla.

“Hadien ba ka Sorkar NDA kala weng ia ka Congress ha Delhi, ka NPP hapoh ka jingialam u National President Conrad K Sangma kala rai ban ialong paralok bad ka NDA ym ban ialong Bhai-Bhai kumba la kynnoh. Ngi la buh hakhmat ia ka mat ka roi ka par jong ngi hakhmat ka NDA bad dei namar kane, ka Jylla kala sakhi ia ka jingwan ki project bapher bapher bala bei da ka Sorkar Pdeng. Ka dei tang kane ka jingiateh kular ba ngi don ym palat ia kata” ula pynshai.

Kat kum ka jingong jong u, kine ki project ki long kiba kongsan bha n aka bynta ka roi ka par ha baroh ki liang jong ka Jylla bad ki paidbah.

“Phi lah ban mutdur ba dang shen ngi la buh mawnongrim ban tei ia ka Secretariat ba thymmai ha New Shillong Townshop ban pynkylluid ia ka Shillong. Ki kam jong kane ka project ba kot haduh T.1200 klur kin sa sdang noh shen” ong u Symbud Myntri Rangbah haba kynthup ia ki Liang Pyrshah da ka ong “Ngam tharai ba kin ia phohsniew ban pynkynriah ia ka Secretariat na sor Shillong watla kila don la palat 40-50 snem”.

Ula kular ba ka Secretariat ba thymmai kan dei ka jingjop kaba khraw duh jong ka Jylla bad ki paidbah bad ong “Nga kyntu ia ki paidbah ka Jylla khamtam ki samla ba kim dei ban ngeit ha ki jingtip ba pynsngewthuh bakla hynrei ban bishar ia ki kam ba bha jong ka NPP. Ka dei ha ka por jong ngi ba ki project bala sahteng kum ka Crowborough mynta ka Vivanta Taj bad ka Five Star Hotel-ka Marriot kila dep. Ngi la buh ia ka IT Centre ha Mawdiangdiang bad ka Lariti Centre ka dei kawei na kiba heh duh hapoh ka thain Shatei Lam Mihngi-Kine baroh ki dei na ka bynta ka jingmyntoi u paidbah”.

“Kumta, ngi donkam ban iatreilang bad ki briew ba na shabar ka Jylla khamtam mynta ba kin wan shuh shuh ki five star hotel bad kawei na ki, kan don ha Ri-Bhoi District khnang ba k samla na ka District kiba la pyndep ia ka hotel management kin ioh kam” ula bynrap.

Nalor kane, u Bah Tynsong ula kam ba kane ka Sorkar ba mynta kala lah ban ai shibun bah ki kam sha ki briew bad ong “Kane ka long wat hapdeng ka jingshah kawang maw hynrei nga ong iaphi ba sngewbha bteng ban leh ia kata namar kat kaba phi dang leh, ka jingkyrkhu ruh ka nang wan sha ki paidbah ka Jylla. Nga kyntu ia ki paidbah ka Jylla ban iai bteng ha kaban duwai na ka bynta ka party khnang ba ngin lah ban wanrah ia ki jingkylla kiba donkam na ka bynta ka jingmyntoi bad ka bha ka miat ki paidbah ka Jylla”.

Haba kyntu ia ki paidbah ka Umsning ban vote ia ka kong Macdalyne , une u Nongialam ka NPP ula ong “Phi long kiba donbok bha namar ka Ri-Bhoi ka dei ka Aspirational District bad bun ki project kin sa wan hynrei ngan ym iathuh ia phi hangne namar lada nga iathuh phin sa ong ba nga wan hangne ban pynbiej ia ki paidbah. Hynrei nga kyrpad ia ki samla jong ka District ba kin trei shitom ha ki jingpule jong ki namar ki kam kila ap ia phi”.

Ula kren ruh halor ki jingmyntoi kaba ki paidbah kin ioh na ka Shillong Western Bypass bad ong “Tang na ka jingsiew bai jaka, palat T.620 klur la siew sha ki trai jaka jong kane ka project”.

“Kumjuh ruh, palat T.5000 klur yn siew bai jaka na ka byta ka Express Corridor ba sdang naduh Umiam sha Malidor haduh Silchar. Ka dei ka project ba T.25000 klur ha kaba palat T.18000 klur ka dei kaba mang hangne ha Meghalaya. Ka sorjamin kala iaid mynta katba ngi dang iakren bad ngi pan ia ka jingiatreilang jong ki Khlieh Nongsynshar Shnong bad kiwei kiwei ki kynhun ba don bynta” ula bynrap.