Iatakhuh ka MTD bad ka VPP | Bthah ka Sorkar ban nym khang ia ki Public Meeting ka Elekshon MDC

Shillong, K’lyngkot 30 : Ka Sorkar Jylla hynne ka sngi Palei, kala pynmih ia ka hukum ba bthah ia ki District Election Officer (DEO) ban hukum ia ki Dorbar Shnong/Rangbah Shnong ba kim dei ban khang ha kaban pynlong iaki Jingialang Paidbah (Public Meeting) jong ki seng sain pyrthei ha kane ka elekshon MDC ka KHADC bad JHADC, ka ban long la 21 tarik Rymphang.

Kane ka hukum kala mih na ka Deputy Secretary ka Tnad District Council Affairs ka Jylla Kong M Shira Kshir hynne ka 30 tarik, halor ka jingujor jong ka Voice of the People Party (VPP) ba dawa ia ka DCA ba kan pynmih ia ki jingbthah ba kyllum ia baroh ki Rangbah Shnong ba kin kiar na kaba shim ia kano kano ka sienjam kaban ktah ia ka jingpyniaid ia ka elekshon kaba laitluid bad ka bym iashah liang.

Ha ka shithi sha u Commissioner & Secretary ka Tnad DCA, u General Secretary bad MP ka MPP Dr Ricky AJ Syngkon ula kynnoh ba ka rai jong ki katto katne ki Rangbah Shnong/Sordar Shnong kala pynduh lad ia ka VPP bad ia ki kyrtong jong ka ban pynlong ia ki Jingialang paidbah (public meeting) ban ialap elekshon.

Kane ka jingujor kala mih tang hadien katto katne sngi, hadien ba ka Mawlai Town Dorbar lem bad ki kyrtong, kila mynjur ban nym pynlong ia ka elekshon MDC ban wan kum ka tamasa, ban pynlong ia ki jingialap elekshon tang da ki Common Platform ha baroh ki Shnong ka Mawlai ym shuh da ki jingialang paidbah (public meeting).

Ka Mawlai Town Dorbar kala shim ia kane ka rai ha ka jingiadonlang u kyrtong ka VPP ban aireng na Mawlai bad kiwei kiwei ki kyrtong.

Ia kane ka rai la pynshong nongrim halor ka jingud jingnam jong ki Kmie Kpa, namar ba ki Khun ki Kti jong ki, ki dang don hapdeng ki eksamin bapher bapher jong ka Meghalaya Board of School Education (MBoSE).

Kat kum ka hukum, ka Deputy Secretary kala ong ba baroh ki Dorbar Shnong/Rangbah Shnong ki dei ban shah ia baroh ki seng sain pyrthei kynthup ki kyrtong shimet ba kin pynlong ia ki jingialang paidbah.