Shillong Iaiong 28: U Symbud Myntri Rangbah ka jylla u Bah Prestone Tynsong hynne ka sngi Thohdieng, ula lum ia ka jingialang bad ki heh Officer bad Engineer ka tnad PWD (Roads & Building) ha Shillong Club bad iatai ia ka jingeh ha kaban pyniaid shakhmat ia ki projek bapher bapher ha ka jylla.
“Ngi la shim bun ki ishu ha kaba iadei bad ka PWD Roads & Building la kadei ka jingduna haka jingdon ki nongtrei, ka jingeh kaba ngi iakynduh teng teng ha ka jingduna jong ka pisa ka tyngka, ka jingeh ha kaban pyniaid shakhmat ia ki projek namar ka jingbym ioh jaka bad ngi la iathir bha ruh ha kaba iadei bad ka jingpyntreikam iaka PMGSY bad iaki skhim kiba la bei tyngka da ka sorkar pdeng bad ka sorkar jylla ha baroh ar tylli kitei ki tnad sorkar” ong u Bah Prestone Tynsong haba iakren bad ki nongthoh khubor hadien bala wai ka jingialang.
Ula ong, ba ha katei ka jingialang ki Officer bad ki Engineer kila ai jingmut ia kaei kaba bha tam kaba ka sorkar jylla kadei ban leh na ka bynta ban pynitynnad bad ban pynsuk ia ki paidbah bad ia ka jylla baroh kawei.
Ha kaba iadei bad ka jingud ba ki don ki kontraktor kiba shna torti ia ki surok bad kitei ki surok kim ju neh slem, u Bah Prestone ula jubab da kaba ong, “Ngi lah iatai ha kaba iadei bad ka Quality Control bad ngin buh ia ki aiñ ki kanun kiban pyrkhing bad kiba khlain bha, khnang ba kino kino ki kontraktor kiba pyntrei ia kano kano ka kam, kadei ban long kaba janai bad ba kin pyndep ruh ia ka kam katkum ka por ba la buh”.
Ha kaba iadei bad ka jingkhapngiah bad ka jingdheng kali ha ka nongbah Shillong, u Symbud Myntri Rangbah ula ong, “Ka sorkar kan ialeh ha kaban pynbun ia ki Link Road (ka surok ba pyniasoh ia kawei ka surok bah sha kawei pat) ha ka nongbah Shillong, Jowai bad Tura”.
“Ngi dang iaid shaid shaid ha ka jingpynkhreh ban shna ia ki Ring Road (ka surok bypass ba iaid tawiar ka sor), hynrei ka jingeh kaba mih kam dei satia ba ka sorkar kam ioh iaka pisa hynrei kam ioh iaka jaka. Ngi hap ban iatai bha ia kane ka mat, kumno ban pynthikna ba ngin ioh iaki jaka, namar don teng teng ba la pyllait ia ka pisa na ka bynta ka projek hynrei ki kam ki sahkut noh namar ka jingbym ai jaka ki katto katne ngut” ula bynrap.
