Shillong, Iaiong 14 : Ka Sorkar Jylla hynne ka sngi thohdieng, kala pynlong ia ka jingiatai ba sani bad ki Heh Ophisar lem bad ki Khlieh Nongsynshar halor ka jingpynkhuid bad pynim pat ia ki Wah ba kongsan jong ka Nongbah Shillong ba kynthup ia ka Wah Umkhrah, Wah Umshypi bad Wah Umkhen.
Ia kane ka jingialang la pynlong ha Yojana Bhavan bad la iashimbynta da u Myntri Rangbah ka Jylla Conrad K Sangma, u Symbud Myntri Rangbah Bah Sniawbhalang Dhar, Myntri Bah AL Hek, Chief Secretary Bah DP Wahlang, ki Heh Ophisar bad ki Nongkitkam Shnong nalor ki Nongmihkhmat ba ki seng bapher bapher.
Ha ka jingialang, u Myntri Rangbah Conrad K Sangma ula ong ba ka thong jong ka jingialang ka long ban ithuh ia ki jingdonkam bad wanrah ia ka action plan jong ki sngi ban wan na ka bynta ban pynkhuid bad pynim pat ia ki lai tylli ki wah ba kongsan ka Shillong. Ula khot ia ka jingiatreilang bad ki jingai jingmut jong ki Dorbar Shnong ha kaban lah wanrah ia u soh.
U Myntri Rangbah ula ong ruh ba ka long kaba donkam ban don ka jingpynbiang tarajur hapdeng ka mei mariang bad ka ioh ka kot haba bynrap “Ka jingialang ba ngi pynlong mynta ka dei shibynta na ki mat treikam jong ka Sorkar ban pynbiang tarajur ia ka kamai kajih, ka ioh ka kot bad ka mei mariang khnang ba yn lah ban iada ia ka mariang na ka bynta ka lawei haba trei ruh ia ki kam ban kamai kajih.
U Conrad ula pynpaw ruh ba ka Sorkar kala kut jingmut ban pynkhuid bad pynim pat ia baroh ki wah kiba don hapoh ka Jylla.
Ula kren ruh halor ki katto katne ki prokam jong ka Sorkar ban tehlakam ia ka jingkylla ka mariang ba kynthup ia ka sewage and waste management, ban pynsangeh ia ka jingpyndonkam plastic, ban pyndonkam ia ki kali eletrik khnang ban pynduna ia ka jingpynjaboh ia ka lyer ba ring mynsiem, ban pynrben ia ki khlaw lyngba ki jingialap bad kiwei kiwei.
Ha ka jingbatai, u Chief Secretary Bah DP Wahlang ula pyntip ba ka Wah Umkhrah bad Wah Umshyrpi ki dei napdeng ki 45 tylli ki wah ba jaboh tam ha ka Ri kumba la lum thup da ka NGT. Ula khot ia ka jingiashimbynta shitrhem jong ki Shnong ki Thaw bad ki kynhun bapher bapher kum ka KHADC, Dorbar Shnong, ki seng bapher bapher.
