Shillong, Jylliew 09 : U Additional Commissioner ki Pulit ka Indore, Amit Singh ula iathuh ba ha ka jingtohkit, ki Pulit kila iohksai ba ka Sonam Raghuvanshi kala iasuhbuit bad la u jong u samla, ban pyniap iala u jong u kurim u Raja Raghuvanshi tang hadien 5 sngi ba ka dep iathoh.
U Amit Singh ula iathuh ba ka Sonam Raghuvanshi ka dei kaba hakhmat eh na ki nongsuba donkti ha ka jingshah pyniap u Raja Raghuvanshi. U pyntip ba dei ka Sonam kaba la iasuhbuit badla u jong u Samla uba kyrteng u Raj Kushwaha, uba la don ha ka kti ki Pulit.
U iathuh ba kine ki shi samla kila iasuhbuit ia kane ka kam bymman tang hadien 5 sngi ba u Raja bad ka Sonam kila pyndep ia ka jingiathoh. Kine ki arngut kila thong da ka pisa ia ki nongpyniap briew ba kin leh ia kane ka kam.
Kine ki lai ngut ki kyrteng u Vishal Singh Chauhan, u Aakash Rajput bad u Anand Khurmi.
Une u Heh Pulit ula pyntip ba kine ki nongpyniap briew kila bud ia kine ki shikurim sha Sohra bad dei ka Sonam kala ai jingtip ia ki shano ba ki don da kaba ai ia ki GPS location.
Ki Pulit kila kem ia baroh 4 ngut kynthup ia u samla jong ka Sonam. U ong ba dei hadien ka jingiohkem ba ka Sonam kala wan ban pyndem ialade hakhmat ki Pulit.
Kat kum ka khubor bala ioh, ka Sonam bad ki 4 ngut ki runar, kila don mynta ha lynti ban wan sha Shillong bad yn sa rah ia ki sha ka Iingkashari District & Session Judge lashai ka sngi ban tian bishar.
