Nongpoh, Nohprah 01: Ka Bor pyniaid District ka Ri-Bhoi hynne ka sngi palei kala iasoi ia ka soskular Memorandum of Understanding (MoU) bad ka SELCO Foundation ban tei ia ki kamra pynkha khun ha ki phra tylli ki Health Sub Centre kiba don sha ki jaka kyndong jong ka District.
Ia kane ka MoU la iasoi hapdeng u Deputy Commissioner Arpit Upadhayay bad ka Huda Jaffar, Director ka SELCO Foundation kaba la sakhi da u ADC Bah M. Tongper, District Medical and Health Officer Dr P. Kharnarry, ka Additional DMHO Dr B. Blah, bad ki nongmihkhmat na ka Sierra Leone, Ethiopia bad Burkina Faso.
Kat kum ka MoU, ka SELCO Foundation kan pynshna ia phra tylli ki kamra pynkha Khunlung (Labour and Delivery Room) ha ki Health Sub Centre kiba don sha ki shnong Nongkyndong ka Ri-Bhoi ia kiban pyndait ruh da ki kor Solar system ban lait na ka jingthut ka bording ha ka por pynkha Khunlung nalor ban pynkhlain ia ki lad jingsumar na ka bynta ki Khynnah.
Ka jingthmu ba la ia soi ia kane ka MOU ka dei ruh shi bynta ban ai bor ia ka SELCO Foundation ba kan tei ia ia ki 300 tylli ki Health Sub Centre.
Haba kren sha ki ladpathai khubor, u Arpirt Upadhayay, Deputy Commissioner ka Ri Bhoi u la pynpaw ka jingkmen ba la ioh ban pyndep ban ia soi ia ka MOU bad ka SELCO Foundation bad u la ong ba ka jingthmu jong kane ka long ban nang ai bor ia ka SELCO Foundation ba kan shna ia ki kamra pynkha khun ha ki shnong nongkyngdong katkum ka juk stad ba mynta khnang ba kan nym pynthud na ka bynta ki longkmie kiba wan ban kha khun sha ki jaka ai jingsumar.
U la ong ruh ba ka jingtei ia kitei ki kamra kha khun ban pyndait da ki solar ban pynbiang bording, kan iarap ruh shibun ban ai ka jingshakri kaba paka ia ki longkmie ba armet bad khamtam eh kan pynshlur ia ki Longkmie ban wan kha ia ki khun sha ki jaka ai jingsumar.
