Shillong, Iaiong 02: Ka USTM kala iasoi iaka Memorandum of Understanding bad ka Microbiologist Society, India (MBSI) haka sngi Baar ha ka “National Conference halor ka mat Bioresource and Sustainability: Current Trends and Future Prospects” kaba la pynlong da ka Department of Applied Biology, USTM bad ka MBSI.
Ha katei ka jingialang la pynkup ruh iaka kyrdan Lifetime Devotion Award sha u Prof G.D. Sharma, Vice Chancellor jongka USTM bad la pyllait paidbah ruh ia ki ar tylli ki kot.
Ki heh ki haiñ kiba la wan ban iashimbynta ha ka National Conference ki kynthup ia u Prof. A.M. Deshmukh, President ka Microbiologist Society India (MBSI); Prof. Kalimuthusamy Natarajaseenivasan Director jongka ICMR- Regional Medical Research Centre, NE, Dibrugarh, u Prof. Bikash Medhi uba long u Professor ka Department of Pharmacology, PGIMER, Chandigarh, Dr RK Sharma Advisor ka USTM bad kiwei kiwei.
U Prof GD Sharma ula ai burom ia katei ka khusnam sha ki samla pule bad ula ong “Kane ka khusnam kadei namar ba ki samla pule ha ka Microbiology ah ka thaiñ shatei lammihngi kiba la noh synniang bha halor ka Microbiology hapoh ka ri India”.
U Prof. A.M. Deshmukh ula ong, ka phang jong ka jingpynneh pynsah ka long kaba kongsan bha bad ka long kaba donkam ban peit la ki kam pynroi ki long kiba lah ban pynneh bad la ki tiar ki tar kidei kiba iadei bad ki bym ktah ia ka mariang.
Prof. Bikash Medhi ula ong ba ka ri India kala noh synniang duna bha ha kaba iadei bad ka jingpynmih ia ki kot ne jingthoh halor ki kam wad bniah ha ka pyrthei watla kila don bun phew tylli ki jaka pule kiba biang bad kumta ka long kaba donkam ban don ka jingiatreilang bad ban iasam mar kylliang ia ki jingnang jingtip.
