Shillong, Naitung 08 : Ka Shooting Association of Meghalaya ha ryngkat ka Tnad Sports ka Jylla, kila iateh soskular Memorandum of Understanding (MoU) bad ka National Rifle Association of India (NRAI) ban kyntiew ia ka jingialehkai siat suloi hapdeng ki samla ka Jylla.
Ia kane ka soskular la iasoi hapdeng u President ka SAM Bah John F Kharshiing, DD Shira, MCS, Director ka Tnad Sports bad u Secretary General ka NRAI K Sultan Singh, ha ka jingiadonlang u Myntri Rangbah ka Jylla Conrad K Sangma, u President ka NRAI Kalikesh Narayan Singh Deo bad kiwei kiwei.
Ka jingthmu jong kane ka soskular ka long ban wanrah ia ka lynti iaid ban shna ia ki jingtei ne jaka iasiat suloi kat kum ki jaka iasiat ka pyrthei ha Meghalaya, ban pyntreikam ia ki prokram ai jinghikai bad coaching, ban ithuh bad saindur ia ka sap naduh ki khynnah haduh ki nongsiat suloi. Ka dei ruh shibynta na ka jingkut jingmut ban pynlong ia ka Meghalaya kum ka jaka ialehkai siat suloi hapoh ka Ri bad ka pyrthei.
Haba kren ha ka jingialang, u Myntri Rangbah ka Jylla Conrad K Sangma ula pdiang sngewbha ia kane ka sienjam bad ong “Kane ka jingiatreilang ka dei pat ka lynnong ba thymmai ha ka histori kam ialehkai ha Meghalaya. Ngi sngew sarong ban iatreilang bad ka NRAI ban wanrah ia ka jinglong jingman ka ban pynkupbor ia ki samla jong ngi ba kin phohsniew kham heh ha ka kam ialehkai siat suloi”.
U President ka NRAI, Kalikesh Narayan Singh Deo ula iaroh ia ka rukom pyrkhat pyrdain jong ka Sorkar Meghalaya bad ong “Ka thain Shatei Lam Mihngi ka don kyrhai ki nongialehkai. Kane ka jingiatehlok kan dei u mawnongrim ia ka Meghalaya ban sei ia ki nongiasiat suloi ba shyrkhei ha ki snem ban wan”.
U President ka NRAI ula ong ruh ba kat kum ka MoU,ka NRAI kan sa pynlong ia kawei ka Open India Championship manla u snem ka ban nang kyntiew shuh shuh ia ka ioh ka kot ka Meghalaya naba palat 4000 ngut ki nongiasiat suloi kin sa iawan ban iashimbynta ha kane ka jingiakop ka ban neh shibnai da kaba pynlut nala ka jong ka pla.
 bad ka National Rifle Association of India (NRAI) ban kyntiew ia ka jingialehkai siat suloi hapdeng ki samla ka Jylla.){kind=link}