Nongpoh, Naiwieng 23: Ka Bor District ka Ri-Bhoi hynne ka sngi Palei, kala iasoi ia ka soskular Memorandum of Understanding (MoU) bad ka North East Transmission Company Limited (NETC) ban pyntrei ia ki katto katne ki project ha ki artylli ki C&RD Block ka District.
Ia kane MOU, la iasoi hadeng u Bah MB Tongper, Additional Deputy Commissioner u ba bat ruh kum u District Planning Officer u ba la mihkhmat ia ka Ri Bhoi District bad u Sh. Anil R Sah u ba dei u nongmihkhmat ia ka NETC ha ka jingsakhilang ruh Raja Brahma, MCS, Addl. Deputy Commissioner & Project Director, District Rural Development Agency bad u Niranjan Rabha, Asstt. Manager- Projects, NETC.
Kane ka MoU ba la ia soi ka dei lyngba ka Corporate Social Responsibility (CSR) kaba la mang na ka bynta ki project jong u snem 2023 bad 2024, ban pyntreikam ia ki kam pynroi ha ki ar tylli ki Block kata ha Umling bad Umsning C&RD Block.
Katkum ka jingpynmang, kawei na ki project na kane ka CSR, la mang ban shna ia ka State-of-the-art Computer Lab ban kyntiew ia ka jingnang jingstad jong ki khynnah pule ha ka Pahambir Lower Primary School kaba hap hapoh ka Umling C&RD Block bad kawei pat ka jingpyntrei ia ka kam pynroi ba kynthup ia ka culvert nalor ka wah Umsohpieng hapoh ka Umsning C&RD Block.
Na ka liang, u Bah MB Tongper, kum u ophisar ka Ri Bhoi District, u la pynpaw ia ka jingkmen halor ka jingwan shakhmat jong ka NETC ban ia treilang bad ki bor district ban kyntiew ia ki kam pynroi bapher bapher nalor ka jingkyntiew ia ki shlem ai jingnang jingstad bad kiwei kiwei pat ki kam pynroi lyngba ka CSR kaba ki don.
U la pynpaw ruh, ba kum u ophisar ka district, u don ka jingkyrmen kaba khraw ba ka jingwan shakhmat jong ki kynhun bapher bapher yn lah ban pynurlong ia shibun ki kam pynroi na ka bynta ka jingmyntoi jong ki paidbah ka them Ri Bhoi District.
