Shillong, Risaw 22 : Ka North-Eastern Hill University (NEHU) hynne ka sngi Ba-ar, kala jam sha uwei pat u mawmer da kaba iasoi ia ka Memoranda of Understanding (MoU) bad hynniew tylli ki kynhun kiba na ka ri bad nabar ri.
Ia katei ka jingsoi ia ka MoU la pynlong ha NEHU Shillong campus, ha ka jingiadonlang u Director ka IIM Shillong u Prof. D.P. Goyal kum u kongsan.
Lyngba ka jingiatehkular la khmih lynti ba kan kyntiew ia ka jingiatreilang ha kaba iadei bad ka pule puthi, jingwad bniah, ka rep ka riang, ki kor teknoloji, ka jingsam mar kylliang ha kaba iadei bad ka kolshor bad kiwei kiwei
Haba kren ha ka jingialang u NEHU Vice-Chancellor Prof. Prabha Shankar Shukla, ula pynpaw ia ka jingskhem jingmut halor katei ka jingiatreilang da kaba ong, “Kam dei tang ka jingiasoi ia ka soskular hynrei ka jingshim ia ka sienjam ban wanrah ia ka jingiatreilang bad ka jingtbit ha baroh ki liang”.
Ula banjur ba kitei ki jingiatreilang ki iaid ryngkat bad ka mishon jong ka NEHU ban sam bad ban kiew shaphrang ha ka jingnang jingtip bad ban noh synniang sha ki riewshimet, ka pule puthi bad ka kolshor jong ka thain shatei lam mihngi.
Ha kaba iadei bad ka jingiatreilang bad ka Indo-Korea Business Cultural Centre (IKBCC), kaban sdang ia ka jingpule ha ka ktien Korean ha NEHU, kan plie lad ia ki samla pule ban tip ia ka ktien ka thylliej bad iaka kolshor.
U Prof. Shukla ula batai ba kane ka jingiatreilang kan pynkhlain ia ka jingiadei hapdeng ka ri India bad Korea bad kan plie lad plie lynti ia ki samla pule ka Jylla ban tip ia ki kolshor jong kiwei ki ri mihngi ka Asia lyngba ka jingsam mar kylliang iaka kolshor bad ka lad ban iohkam iohjam”.
Sa kawei ka MoU la iasoi bad ka ICAR – Agricultural Technology Application Research Institute, Guwahati bad kane ka jingiatreilang kan pynleit jingmut ha kaban ialeh lang ia ka jingwad bniah, ban tei mar kylliang ha kaba iadei bad ka jingstad bad jingtbit, da ka jingthmu ban tei ia ka jingmut jingpyrkhat ban thaw ia ki lad ki lynti ban weng ia ki jingeh kiba mih ha ka kam rep kam riang bad ban kyntiew ia ki thain nongkyndong.
U Prof. Shukla ula ong, da kaba iatreilang, ngi thmu ban wanrah jingmyntoi ia ka thain bad ia ka ri da kaba pynshlur ia ka jngsengkam lajong bad ban sam mar kylliang ha kaba iadei bad ka jingpyndonkam ia ki kor teknoloji.
Ka CSRBOX Foundation (SMEC Trust) kan pynbiang ia ki samla pule ka NEHU ban ioh jingtip halor ki sap ki phong ha ki karkhana, ban ioh ei ia ka IBM-Certified Program bad ka lad ban iohkam. U Prof. Shukla ula banjur ba kane kaj ingthmu kan pynthikna ba ki samla pule kib long kiba la shah pynkup bor ban iohkam iohjam.
Ka NEHU kala pyniar ruh ia ka jylli treikam ha kaba iadei bad ka Film & Entertainment Industry lyngba ka MoU bad ka Black Screen Studio Inc., Mumbai. Kane ka jingiatreilang kan thaw ia ki lad ha ka kam shna phlim, ban iathuhkhana bad kiwei kiba iadei bad katei ka bynta bad ka NEHU kan ioh ia ka jingshemphang ha katei ka kam.
“Kane ka jingiatreilang kan ailad ia ki samla pule ban ioh ia ki lad bad ki kabu ha ka kam shna phlim” ong u Prof. Shukla.
Da ka jingiatreilang bad ka State Cancer Institute, Gauhati Medical College, ka NEHU kan donbynta ha kaban wad bniah lang ia ka jingpang Cancer bad ban ai ia ki jinghikai ia ki samla pule bad ki nonghikai.
U Prof. Shukla ula pynpaw, bad a ka jingiatreilang ngin lah ban noh synniang sha ka jingsngewthuh bha bad ban shimkhia ia ki jingeh kiba mad ha ka liang ka koit ka khiah.
Ka NEHU kala shi mruh ia ki sienjam ban iatreilang bad ka JETS 24×7, Shillong, kaban sdang ia ka jingkamai ki E-Scooter bad E-Rickshaw hapoh ka campus.
“Kane ka sienjam kaba iadei bad ka mariang kan pynduna ha ka jingpynmih iaka carbon bad kan long kum ka nuksa ban don ia ka leit ka wan kaba khuid bad kaba biang” ong u Prof. Shukla.
Ka NEHU kala iatreilang ruh bad ka TeamLease EdTech, Mumbai, ban pyndap ia ka jingduna ha kaba iadei bad ka jingioh jinghikai hapoh kamra pule bad ki karkhana kiba donkam ban kyntiew iaka sap ka phong lyngba ka Digital Education.
U Prof. Shukla ula banjur ia ka jingkongsan jong ka jingiatreilang kaban pynriewspah ia ka jingnang jingstad ia ka skulbah NEHU bad kan kyntiew ruh ia ka imlang sahlang baroh kawei.
“Kitei ki jingiatreilang ki pyni ia ka jingiengskhem ha ka jingkular ka jong ngi ban leh ia kiei kiei kiba thymmai, ka jingpynneh pynsah, ban kiew ha ka pule puthi bad ban wanrah iaka jingkylla ha ka imlang sahlang” la pynkut u VC.
