Shillong, Rymphang 14: Ka NEC Shillong, IIM Shillong bad ka Ministry of DoNER ha ka sngi Ba-ar, kila iasoi iaka soskular na ka bynta ban bteng iaka jingtreikam jong ka Dr. APJ Abdul Kalam Centre for Policy Research and Analysis.
Ia kane ka MoU la soi da u Angshuman Dey, Joint Secretary MDoNER, u Moses K Chalai uba long u Secretary ka NEC bad u Prof DP Goyal u Director ka IIM Shillong ha kaba la iadonlang u Chanchal Kumar, Secretary ka Ministry of DoNER bad kiwei kiwei ki heh ophisar jong ka DoNER, NEC bad IIM Shillong.
La thaw ia ka Dr. APJ Abdul Kalam Centre for Policy Research and Analysis lyngba ka jingiasoi soskular jong kitei ki 3 tylli ki kynhun ha ka 15 tarikuRisaw 2016 da ka jingthmu ban pynmih iaka center kaba paka kaban ai jingiarao ia ki jylla jong ka thaiñ shatei lammihngi bad ia kiwei ki kynhun ha kaban pynwandur bad ban pyntreikam bha iaki projek, ban kyntiew ia ki kam ha kaban pynmih ia ki jingshna kiba thymmai bad ban treikam bha hapoh ka thaiñ.
Haba kren ha ka jingialang u Prof D P Goyal, ula pynpaw ia ka jingkmen bad pynkynmaw iaka kam don nam jong u President barim ka ri u (L) Dr. A P J Abdul Kalam bad ka jingiohi jngai ka jongu ha ki kam pynroi.
Ula kdew ruh ia ki sienjam bad ki bynta kiba kongsan kiba la leh da ka Dr Kalam Centre ha ki snem kiba la dep bad ula banjur ba ka jingpynjlan iaka jingtreikam ka Soskular kan iarap shibun ha kaban wanrah iaka jingiadei kaba iajan hapdeng kitei ki 3 tylli ki kynhun bad kan pynkhlain iaka jingkular na ka bynta ban kyntiew iaka roi ka par ha ka thaiñ North East.
Katba u Moses Chalai, ula pynpaw iaka jinsgngewhun halor ka rukom treikam jong kane ka Centre kumba la khmih lynti bad ula kyntu ia kane ka Centre ba kan treikam halor ki polisi, ki kyndon jingbthah jong ka sorkar pdeng bad katkum ka jingangnud jong ka thaiñ ban pynlong ia ki kiba tbit.
Ula pynpaw iaka jingkmen halor ka jinglah ban tei pyndep iaka Administrative Building jongka Dr APJ Abdul Kalam Centre kaba la bei tyngka da ka Ministry of DoNER lyngba ka NEC.
U Chanchal Kumar, ula kitbok kitrwiang ia kane ka Centre ba kan long kum ka shlem kaban saindur ia ka thaiñ bad ula pynpaw ruh iaka jingdonkam ban sdang noh iaka North East Development Fellows lyngba ka Dr. Kalam Centre na IIM Shillong kaban wanrah iaka jingkylla haka rukom treikam bad ha ka rukom ai jingshakri ka sorkar.
Lyngba ka jingpynjlan iaka jingpyntreikam ia ka soskular, ka Dr. Kalam Centre kan bteng ban treikam shitrhem. Ka Dr. Kalam Centre kan treikam halor kiba bun ki mat kiba kynthup ia ka Training and Development, Research and Consultancy, Policy Advocacy, Knowledge Dissemination bad Civic Engagement.
Ka thong jong ka Centre ka long ban long kum ka Shlem ban saindur ia ka pyrkhat pyrdaiñ na ka bynta ka thaiñ North East lyngba ka jingpyndonkam ia ka rukom treikam kaba bha tam ban ai ia ki jingtip kiba paka na ka bynta ban pynneh pynsah ia ki jingdon jingem bad ka rukom pyndonkam ia ki hapoh ka thaiñ shatei lam mihngi.
Ban pynbiang ia ki jingdonkam ha kaban pyntreikam ia ki polisi bad ki prokram jongka Ministry of DoNER bad ia ki mishon ki jongka ban kyntiew sted iaka imlang sahlang bad ia ka ioh ka kot jong ka thaiñ shatei lam mihngi bad ban ai jingkyrshan ia ka DoNER/ NEC ha kaban pynwandur iaka mat treikam na ka bynta ban kyntiew iaka roi ka par ha baroh ki liang haka thaiñ shatei lam mihngi.
Ban kyntiew ha kaba iadei bad ka Human Resource Development ha ka thaiñ da kaba kyrshan lang ia ki jaka pule ha kaban pynwandur iaka Curriculum, Course bad Capacity Building ia ki ophisar kiba don bynta ha kaban pyntreikam ia ki polisi bad ki prokram jong ka sorkar pdeng bad sorkar jylla.
Ban leh ia ki kam wad bniah ne Research bad Analysis ha kaba iadei bad ki mat ban kyntiew iaka thaiñ shatei lam mihngi ryngkat bad ka DoNER, NEC bad ki jylla ne shimet bad ban ithuh ia ki jingduna ha kaba iadei bad ki prokram kam pynroi, ki skhim ha ki shnong haka thaiñ shatei lam mihngi khnang bay n lah ban pyntreikam bha ia ki.
